Guwahati-ah Rahul Gandhi kaihhruai Yatra dang

Guwahati-ah boruak sang tak awmin Congress worker 5000 rual te chuan Rahul Gandhi kaihhruaia Bharat Jodo Yatra neih mekah khapwui luh an tum chu state police ten remti lovin an lo dang.
Himanta Biswa Sarma sorkar chuan Yatra-in Guwahati lamlian a paltlang phalna an pe duh lo va. Chhuanlam an siamah working day a ni a, khawpui kawng pawimawha yatra neih a nih chuan traffic jam siamin harsatna nasa tak a thlen thei an ti a. Chuvang chuan State sorkar chuan Yatra chu lower Assam lamah kalpui mai turin an ti a, Congress worker-te chu khawpui ring road National Highway 27 zawh mai turin an ti a ni.
Rahul Gandhi chuan, “He kawng hi Bajrang Dal te kalna tho a ni a, BJP chief JP Nadda pawhin he kawng hi rally neih nana a hman tho a ni. Barricade siam a ni a, kan seng hawi a, dan kan bawhchhe lovang. Kan chak lovah ngai suh u, Congress worker te hian thil an tithei a ni,” tiin a sawi.
Assam mipuite chu rahbehin an awm mek a ti bawk a. “Meghalaya-ah zirlaite nena inkawmna kan neih tum min khapsak a, thuneitute chuan zirlai ten min hmuh an rem ti lo. Mahse, pawnah lo chhuakin min lo hmu tho,” tiin a sawi.
“Congress worker te hian BJP-RSS te hi an hlau lo, Assam-ah pawh kan hneh ang. Officer te chu ti tura an hrilh an ti mai a, mahse, dikna a awm ngei tur a ni. Nangmahni bei turin ka lo kal lo, kan hmangaih che u. He ta kan awm chhan chu CM corrupt ber Himanta Bisa Sarma of Assam bei turin a ni,” tiin a sawi.
Congress worker-te chuan state thuneitu tena khawpui luh an remtih lohna chhuanlam chu beitham lutuk an ti a, Assam-ah Congress leh BJP sorkar inbakkaih nasat lai a ni bawk a. Congress-te chuan Himanta Biswa Sarma sorkar chuan Gandhi yatra neih chu kawng tinrenga tihbuai an tum tiin an sawi bawk a.
“Assam kan luh chiah a\angin India ram CM corrupt ber hian kan convoy te, property-te kan hruaitu te chu a misual rual te hmangin min bei char char a ni,” tiin Congress hruaitute chuan an sawi.
A hma niin Rahul Gandhi chu 15th century social reformer thlan a tlawh phalsak a ni tawh lo bawk a. Rahul Gandhi chuan Vaishnav Saint Srimanta Sankardeva thlan tlawh tum a ni a, mahse, Chief Minister Sarma chuan Ram Mandir ‘pran pratistha’ ceremony tawp hma chuan tlawh remtih a ni lo a ti tlat bawk a.
“Rahul Gandhi chu Ram Temple leh Batadrava Satra inkarah inelna a awm thei ka ti a, TV channel te chuan Ram Temple Pran Pratishtha ceremony an tichhuak ang a, a lehlamah Mahapurush Srimanta Sankardeva pinna hmun a tlawh an tilang bawk ang a, chu chu Assam tan a \ha lo,” tiin Sarma chuan a remtih loh chhan a sawi.
Khanapara-ah mipui tam tak ten au chung leh drum vaw chungin Rahul Gandhi chu lo hmuakin police tena barricade an siam te chu an chawisawn a ni.
“Barricade te kan chawi sawn a, chakna kan chang a ni” tiin AICC in-charge Assam Jitendra Singh chuan a sawi.
Assam Chief Minister Himanta Biswa Sarma erawh a thinrim hle thung a, Assam chu peaceful state a nia hetianga ‘naxalite tactics’ hi kan culture-ah a awm ve lo, a ti thung a. “DGP Assam Police chu in hotu Rahul Gandhi chu mipui fuihpawrhtu tia man turin ka ti a, i handle a footage i post te chu finfiah nana hman a ni ang. In chet dan mawi lo leh guidelines in zawm loh avangin Guwahati-ah traffic jam turu tak a thlen phah a ni,” tiin Biswa Sarma chuan a sawi thung.
Rahul Gandhi chuan Assam sorkarin ring road zawh tura a tih zawkah chuan kawngzawhna a nei zui ta a ni. Yatra hi tunkar Ningani thleng Assam ram chhungah neih a la ni ang.