Gwen Stefani pualin Hollywood Walk of Fame-ah arsi dah ta

Gwen Stefani puala Hollywood Walk of Fame-a arsi chu niminpiah khan an hawng ta a, a pasal Blake Shelton leh a fate pathum pawhin a puala arsi hawnnaah hian an tel pui.
He arsi hawnaa thusawitu Blake Shelton chuan a nupui chu fakin, “Kan intawn atanga kum 10 dawn hnua heta ka din lai hian, chiang taka ka sawi ngam chu a (Gwen) nuna thil pawimawh ber chu nu a nihna a ni. Chuan, hei hi kan sawi tel bawk ang e, chutiang chu kan eizawnnaah ang chiah hian an vang teh mai a nia,” a ti.
Shelton thusawi laihian Gwen Stefani hnuk a ulh a, a mittui a dang zo lo. Shelton chuan, “Vawiina a project danga chawimawi a ni hi a lawmawm a, khawvela arsi lian ber a nihna hi. Ka ngaihdanah chuan Gwen hi Walk of Fame-a arsi phu ber zing ami a ni. Music a ni emaw, television, movies leh fashion bakah beauty thlengin, a chungnung berah hian vawi duai lo a lo chuang chhuak tawh a, a style danglam tak mai avanga khawvelin a duh rawn a ni,” a ti bawk.
Stefani chuan Instagram-a a pual arsi hawn a ni ta lawmawm a tih thu post-in, “Anaheim a hmeichhe naupang pakhat ve mai khan Hollywood Walk of Fame-ah a pualin arsi a nei ang tih hi tuman an suangtuah phak bik lo ang. He zinkawng min zawhpuitu, kum hei leh chen min zai puitu zawng zawng te, ka hmangaih vek che u,” a ti.
Gwen Stefani pasal, Blake Shelton pawhin thla nga kalta khan Hollywood Walk of Fame-ah hian a pualin arsi a lo nei ve tawh bawk a ni.
Gwen, kum 54, hian a ex Gavin Rossdale nen fapa pathum- Kingston, kum 17, Zuma, kum 15, leh Apollo, kum 9, an nei a, Blake nen erawh fa an nei lo.