Ha ngah ber record siam

Kalpana Balan, kum 26, chuan a ha chung leh hnuai lam belhkhamwin ha 38 a nei a, Guinness World Records-in khawvel hmeichhe zinga ha ngah berah an puang. He Indian nu hian mipangngai aiin ha parukin a ngah zawk a ni. Kalpana hi hmeichhe zinga ha ngah ber a nih rualin mipaah erawh tluk loh a la nei ve tho, mipa zinga ha ngah ber chu Canada mi Evano Mellone niin, ha 41 a nei ve thung.
GWR-in a tarlan dan chuan Kalpana hi a tleirawl lai atangin a ha hi pakhat te tein a to belh zel a, engmah a nat phah chuang lonain, thil ei leh thial erawh a tiharsat ve deuh chang a awm thin. A chhungte mipangngai aiin ha a ngah bik tih an hriat chuan phawi then sak an tum nghal hial a ni.
Mahse, Kalpana ha te hi phawi mai theih a ni lo va, an dentist rawn chuan a ha chu a to chhuah vek huna phawi law law turin a lo rawn a, mahse, a hnuah Kalpana chuan a ha phawi a hlauh tak tlat avangin phawi lovin an dah ta reng a ni. Tunah chuan Kalpana hian a ha hnuailam (mandibular)-ah midang aiin ha paliin a ngah zawk a, a chunglam (maxillary)-ah pali bawkin a ngah bik bawk.
Kalpana chuan a ha ngah chu record siam nana a hmang ta chu lawmawm a tih thu sawiin, “Guinness World Records title ka dawng ta chu ka hlimpui khawp mai. Ka dam chhunga hlawhtlinna ropui ve tak pakhat a ni,” a ti.