Haaland leh Kane ang maia Italy rama ‘hot’ Martinez

Serie A season kal mek khelh 12 atanga goal 12 thuna league table-a Inter Milan hmahruaipui mektu Argentina forward Lautaro Martinez hi England ram vul mek Erling Haaland te, Germany a thlen tirh phat atanga headline la luah chho ta char char Harry Kane leh midfielder ni chunga Real Madrid goal thun khawl ni chho ta Jude Bellingham-te ang maiin Italian football-ah chuan tunlaia mite ngaihsanber a tih theih hial awm e.
October thlaa a chetthat em avang khan a vawikhatna atan Serie A player of the month award hlan a ni a; record leh history tharin a bawm chho kal mek a, Italian top flight-ah top scorer niin, a team chu table-ah hma a hruaipui a; Champions League lamah pawh khelh li atanga goal hnih nei tawhin, knockout stages a luhpui tawh bawk.
Europe league lian zual pangate kan en chuan Bundesliga lama goal thun hnem ber ni mek Bayern Munich striker Kane chuan match 11-a goal 17 neiin, league pangate zingah top scorer a ni.
Paris Saint-Germain forward Kylian Mbappe chuan dawtin, game 11-ah goal 13 a nei tawh a; Premier League lama goal thun hnem ber ni mek Manches-ter City forward Haaland pawhin goal 13 tho tilut ve tawh bawk mah se Mbappe ai hian khelh khatin a khel tam.
Serie A top scorer kan hre tawh a; La Liga lamah match 11-a goal 10 thun tling tawh Belling-ham chu goal khung hnem ber a ni mek ve thung.
Internazionale striker Lautaro Martinez lam hawi zui leh ta ila, Argentine hi Serie A season tir lam match riat khelh thlen ruala Inter tana goal 10 chin leh a chunglam (double figures) khung thlei pha player pathumna a ni.
Inter Milan boruak that vanglai a ni chho leh ta a, an inlungrualna a hmuh theih a; kumin nipui thawt laia Lilian Thuram leh Sandra Thuram-te fapa Marcus Thuram an senglut khan season bul an tan fuh kal zelna kawngah thui takin pui ve bawk mah se fak hlawh ber ni lo thei lo chu captain Martinez a ni.
Kumin September thlaa Inter-in sili fai tehrenga Salernitana an sawpna goal khungtu Lautaro Martinez hi Serie A substitute zinga goal li thun tling hmasaber a ni a; talented player a nihzia hi hai theih rual lohin lantir tawh mah se goal bula a chetha mar lo thiun erawh amaha mite zawhna awm thin a ni.
Argentine hi hming lemah ‘El Toro’ tih a ni thin a, chu chu Spanish tawng niin, bawngpa (The Bull) tihna a ni.
Nikum World Cup-a a ram a champion-pui tum kha amah bakah fiah leh chuan ngai tawh lo Lionel Messi telin Argentina rama player tha ber berte enchhuahna hun tha atan an hualsak kha a ni a; mahse, tournament tir lamah El Toro chuan an team supporter-te sawisel a hlawh ta tlat a, mipui lakah inrin-tawkna a hloh niin a lang.
Julian Alvarez chuan a rawn nekchhuak ta chiah reng kha a ni a; khami hnu khan derthawng taka tlang leh hram hram thin Argentina khelh danin hma a sawn chho a, chutih rualin Qatar rama hnehna tluantling an channa kawngah khan fial match thlengin dinhmun derthawng an kalsan thei lo a nih kha!
A tir lamah sawisel a tawk ti mah ila Martinez khan World Cup semi-final an luhna kawnga Netherlands laka penalty shootout hnehna (4-3) an channa goal pawimawh a chhuihlut a, kha chakna goal kha khung lo ta se an champion kher lo thei ve tlat!
Arab ram tournament liana a harsatna tawh chungchang sawi-chhuakin, “World Cup-ah khan ball ka pet hlei thei tlat lo a, ka kheimit hi tawrh harsa khawpin a na ngut ngut a, chutih laiin min thlaktu Julian rawn chetha chho ta lutuk hmuh khan min tihlim ngang mai, a chhan pawh khatih laia squad mamawh ka pek theih loh kha a rawn pe thei ta bik a ni,” a ti.
Season liamta khan March thlatir lama Spezia an tum tumin penalty a hlah a, game kaw chhung teh meuh goal a khung lo zawn bawk! Coppa Italia game-a Juventus an hmachhawn tum phei kha chuan media tamtakin Inter tana khel chhe berah an puang sup sup nghe nghe!
Season a thar a, kum 26 mi Martinez chuan Nerazzurri tan goal a khung chho ta mawlh mawlh a, Europe league lian danga an worldclass player-te nen khaikhin a ni chho ta mek a; a talent kawl hi Italy hian kum tamtak chhung chu a la tuipui dawn niin a lang!