Hachhek bialin kuhva cheng nuai 5000+ man hralh tawh

Kuminah Hachhek bialin kuhva rah cheng nuai 5000 chuang man an hralh tawh a, hralh tur an la nei zel. Cheng nuai sang chuang man hralh tawh Rengdilah Thawhtanni khan Kuhva Kut hman a ni.Hachhek Bial Kuhva Ching Pawl (HBKCP) hruaitute sawi danin, kumin hian Hachhek biala khaw 21-a kuhva chingtute cheng nuai 5080 chuang man an hralh tawh a. An la hralh mek a, a fur rah hralh tur an la neih avangin an lakluh hi ala pung dawn. A mimala hralh tam ber chuan cheng nuai 40 man a hralh tawh a ni.
Rengdil khua bik hian cheng nuai sang chuang man an hralh tawh a. Rengdil khuaa kuhva chingtute leh Land Resources, Soil & Water Conservation department tangdunin Kuhva Kut hi an buatsaih a. Hmanpuitu chief minister Lalduhoma chuan kuhva chingtuten kuminah rate tha taka kuhva an hralh chu sawrkar a lawm a, an tana an beih nasat zia hrereng a, a rah duhawm tak an tel chho mek chu a chingtute aia nasa mahin an lawm tih a sawi.
“Kan sawrkar tirh phat atangin hma kan lakna langsar zing ami chu ruihhlo leh kuhva tawlhruk titawp tura hma lak a ni a, na takin kan nawr. Kuminah Mizoram chanchina kuhva rate that ber kum a lo thleng ta. Kuhva tawlhruk do hna thawktu police, tlawmngai pawl, magistrate leh an thawhpuite pawhin an thawhrim rah hi an hriat chuan an hlim ve hle ka ring,” a ti.
Chief minister thusawi dang:
8 Rengdilah hian chhungkaw 480 vel in khawsa a, kuhva huan in nei deuh vek. Sum in lalut hnem thin si a, bank hi nei thei ula kan duh. Mizoram Rural Bank dahtir dan kan dap dawn a ni.
8 Soil department chhinchhiah danin, tunah hian Mizoramah hectares 30000 vela zauah kuhva kan ching mek a. Kumina kan thar zat hi kan la hre thei lo. Nikum khan quintal nuai hnih vel kan thar. A hralhna a awm that phawt chuan kuhva hian kan ram economy-ah a thawhhlawk tham tawh a ni.
8 Sawrkar lam ngaihdanah kuhva huan zauh zel tawh loh nise, tih a ni na in, kuthnathawktute tan a tha si a, Mizoram sawrkar chuan kuhva huan tihzauh zel kan thlawp. Kan flagship scheme – Bana Kaih loan component leh CM Special Package atang hian kuhva huan a siam theih ve ve a ni.
8 A hralhna lama harsatna thleng palh thei reng a ni a, a sawngbawlna neih tha kan ti a. Buhchangphaiah a process-na kan peih tawh a, kan hawng thuai ang. NEC sum cheng vbch.7.43 hmangin Zamuang leh Chemphaiah Kuhva Processing Plant kan din mek.
8 Soil department hnuaia thlai – kuhva, rubber leh hmunphiah huan panna kawng (link road) siamna tur NABARD leh SASCI sum vbch. 27.66 hmuh a ni a, link road km. 170-a thui hmun hran hranah laih tura ruahman a ni.