Hall atana department ram sah thlak tumna a rem loh dan hrilh

Ramhlun Venglai khawtlangin community hall atana sawrkar hnena Industries department ram an lo dil tawh leh a thuphunga sawrkar lamin a pawm tawh, tun thlenga la tih fel loh chungchangah sawrkar lam aiawhte nen Ningani khan an inkawm.
Commerce & Industries minister F Rodingliana, Aizawl North-II bialtu MLA, minister Dr Vanlalthlana, AMC Ward No.III corporator C Lalchhandami te chuan Ramhlun Venglai Hall Demand Committee nen DIC (District Industries Centre) Aizawl ram thenkhat satthla a, sawrkar hmasa in a thuphunga a lo pek tawh chungchangah DIC ram hmunhma enho pahin an inkawm.
Industries minister chuan, DIC hmun behchhan hian sawrkar laipuia Ministry of MSME hnuaiah project pawimawh tak thehluh a ni a, geo-tagged vek tawh a ni tih a sawi.
Industry-a eizawngte tana agency pawimawh tak tak – MSME-DFO Tlangnuam, KVIC Damveng, NSIC Guwahati, SIDBI Tuikhuahtlang chu helai hmunah hian dahkhawm a, a dawrtu entepreneur-te tana awlsam leh sum hmang tlem zawka office an dawr theih nana ruahmanna project thehluh tawh a nih avangin, an dilna hmun tak hi chu a remchan loh mai thei tih a sawi a. Chutihrualin, Ramhlun Venglai mipui hmun mamawh chu DIC ram sir thenkhat sah thlak zawka tih hlawhtlin hram dan zawnpui a tum tih a sawi a ni.