Ward No19 inthlanah vote sang chuangin ZPM candidate chak

Aizawl Municipal Corporation Ward No.19 corporator tur thlanah ZPM candidate Dr C Malsawmtluangi chu vote 1042-in a chak a, tlinga puan a ni.
June 25-a vote thlak Ward 19 – Kulikawn, Tlangnuam, Tlangnuam Vengthar, Saikhamakawn, Melthum leh Hlimenah a vaia vote 13344 awmah vote 7342 (55.02%) a tla a. June 27 khan vote hi chhiar a ni.
ZPM candidate Dr C Malsawmtluangi hian vote 3544 a hmu a, amah hnaih bertu MNF candidate Dr Lalrinzuali Hrahsel-in vote 2502, INC candidate Effie Vanlalhmangaihi’n vote 1170, BJP candidate K Vanlalruati’n vote 102 a hmu a; NOTA vote 24 a awm a ni.
Vote chhiar zawh a nih veleah returning officer Lalmuansanga Ralte chuan tling ta Dr C Malsawmtluangi hnenah hian certificate of election a hlan a ni.
Tarlan tawh thin angin, Ward 19 hi AMC inthlanpui hnuhnung berah hmeichhe tana seat hauh bik a ni a. ZPM candidate Baryl Vanneihsangi Tlau a tling. 2023 MLA inthlanpuiah Aizawl South-III bial atangin ZPM ticket-a thlantlin a nih leh tak he ward-a corporator a nihna hi a chawlhsan a, State Election Commission chuan by election nei turin a ruahman ta a ni.
Heti hian Aizawl Municipal Corporation-a corporator 19 awm zingah ZPM hian corporator 6 a neih chhunzawm ta zel a, INC-in pahnih neiin, a bak zawng hi MNF niin, an ni hi sawrkarna chelh mektu an ni.