Halpuah hal… A mawl theih hle mai!

Halpuah leh a kaihhnawih chungchang ngaihtuahtu tura din Committee on Prevention of Firecracker and other Pyrotechnic Materials chu tunhnai khan home minister hovin an thukhawm a. Kumin hun pui vuakveta halpuah leh a kaihhnawih khap dan tur chungchang an rel ho a.
Supreme Court pawhin halpuah hal avanga boruak chhia insiam nasa thin lutuk hi a vei hle a, kum 2021 khan Delhi-NCR huam chhunga hman tur halpuah hal khapna a lo tichhuak tawh a; boruak chhia siam chhuak lo chi halpuah “Green Firecracker” (eco-friendly) chauh hman a phal a. A hnu kum 2023 khan India ram pum huapa zawm turin thupek hi a chhuah leh bawk a ni.
Kan hriat angin, Mizoramah pawh, hun rei tak ata tawh, halpuah zawrh leh hal khapna dan hi Krismas hma thla khat velah tih chhuah a lo ni tawh thin a, a hlawhtlin loh dan pawh sawi vak ngai lova kan hriatsa vek a ni. |henkhatin, sawrkar hian a ngaihtuah tlai thei lutuk a, sumdawngten halpuah an chawkluh fel vek tawh hnuah khapna dan a chhuah chauh thin a, awmzia a awm lo, an ti a. Sawrkarin chu chu ngaipawimawhin, hun pui a thlen hma thla thum vel la awmah khapna thupek a tichhuak tan a, a hun a lo thleng a, awmzia a nei tak tak chuang lo. Khapna dan tihchhuah hun a hma leh tlai khan awmzia a nei tak tak lo va. A chhan pawh, a nihna tur anga khauh taka khapna dan kenkawh that a nih thin loh vang a ni ber awm e.
Tuna sawrkar thar hian tan a rawn la thar ve leh a. Sawrkar thar a pian hun kha December thla tir a nih avangin, a kum khatnaah an che tak tak hman lo. A kum hnihna 2024 hun pui vuakvetah erawh mothar tha a hriat hle a. Khapna dan bawhchhia mi 53 man an ni a, heng zinga mi 14 chu thiam loh chantir an ni. Halpuah leh a kaihhnawih man hlutzawng pawh cheng nuai 23.13 zet a tling.
Hei, tunah chuan August thlaah halpuah chungchang ngaihtuah a ni a, hun pui (Krismas leh Kumthar) thlen hmain thla li a la awm a, an lo inhmakhua hma hle a, a lawmawm e; nikum aiin hma kan sawn turah ngai ta ila.
Tunhma kha chuan naupangin khawlaiah halpuah leh halmawi an hal a, naupang leh tleirawl/rawlthar te tihturah kan dah a, puitling an inrawlh meuh lo. Tun hnuah hian a inlet deuh thawk ta a; puiltingin kan uar zawk ta a ni ber e. Halpuah halin boruak a tihchhiat dan pawh a hrechiangtu zawk chu puitlingte bawk hi kan ni a, naupangin halpuah an lo hal a nih pawha khaptu tur zawk kha, a phur phurah kan tang ta hlauh mai. I inngaihtuah harh teh ang u. Puitling rualin dan bawhchhiat kan tum ngar ngar a, chu mai chu a la ni lova, midangte tana pawi thlen thei, mahni tan pawha pawi bawk si, sum tam tak tak kan la seng zui; a mawl theih hle mai!