Halpuah/halmawi khap politic game emaw ti pawl an awm – K Sapdanga

On Jan 6, 2025 5 0

Halpuah/halmawi khap politic
game emaw ti pawl an awm
– K Sapdanga
Halpuah leh halmawi lam sawrkarin khapna thupek a siam chu politic game emaw ti pawl an awm tih Home minister K Sapdanga chuan a sawi a. Thupek zawmtute thlavang hauhna atan a zawm lo te an phu tawka hremna pek chu thupek chhuahtute tih makmawh a ni tih a sawi.
2024 Krismas vuakvet leh kumthar 2025 chuankai dawna sawrkarin halpuah leh halmawi lam chi hal lo tura mipui hnena dan hmanga thupek a siam chu zawm a hlawh vek loa, 2024 zanlai pelh dawnah puak tanin, 2025 zing lam, darkar chanve hun tling lo deuhah a puak nasa a, kumdang ai chuan hal a tlem deuh nia ngaih a ni. Aizawl bakah district khawpui dang thenkhatah pawh halpuah/ halmawi lam hi hal an awm nual a. Kum dang ai chuan a nasa lo deuh vek nia thu dawn a ni.
Aizawl District Police hotute atanga thudawn danin, hemi lai vela halpuah/ halmawi lam haltu an hriat theih chinah thubuai 33 ziahluh a ni tawh a, mi 14 man niin, a case hi bail theih a nih angin bail-a chhuah leh an ni. A dang pawh hi bawhzui zel an tum a ni.
Home minister chuan sawrkarin halpuah/ halmawi hal leh zawrh a khap a, YMA leh kohhran bakah Congress party-in a thlawp thu a puang bawk a, sawrkar thupek chu politics game emaw ti pawl an awm tih a sawi. “Mipuiin an zawm that chuan eng pawl emaw hmingthatna, eng pawl emaw mualphona ni dawna hre tlat pawl an awm a. Kohhran leh YMA sukthlek zawng apiang runluih tul ti tlat mi tlemte an awm bawk. Hengho hian thahnemngai takin halpuah kha an hal ta a ni ber mai. An hal hnem ang huin a haltu an tam lem lo tih a hriat a, veng khatah in 5 bawr an ni,” a ti.
A puah nasat hlima boruak bawlhhlawh zawng tehna, air quality index-ah 115 a ni a, kum hmasa zan khan 597 a tling tih a sawi. Kohhran leh YMA runluihtute chu chhinchhiah tham, chhui chhuah harsa lo tak an nih hmel tih sawiin, “Tun hnuah an tih tawh lohna tur leh, thupek zawmtute thlavang hauhna atan an phu tawka action lak ngei chu thupek chhuahtute tan tihmakmawh a ni ngei ang,” a ti.