Halpuah – halmawi

Hunpui lo thleng tura halpuah leh halmawi hrang hrangte khap dan tur chungchang relin tun hnai khan home minister hovin thutkhawm a ni a. Hunpui Krismas leh kumthar thlen nan ni 105, thla thum zen zawn a la awm a, tun atanga hmalak dan tur rel a, chet lak nghal a nih chuan, state pawn atanga halpuah-halmawi lo lut tur pawh a tam zawk chu dan chah hman a beisei theih awm e.
Hunpui laia halpuah/halmawi khapna thupek hi sawrkarin puang kum tinin, YMA nen te pawh ngawrh taka hmalak ni thin mah se, zawm a hlawh lo thin hle a. Thawkkhat lai kha chuan Krismas vuakvetah halpuah hal an awm mang lo hman a, kum tharah pawh tunhma zawng aiin halpuah hal chhung a rei lo a. 2018 vel khan sky lantern a rawn lar hluai a, kha khan halpuah ri a titlem deuh bawk. Mahse, hun a lo kal leh deuh a, ngai kan awh chho leh a, kum tin halpuah/halmawi khapna thupek tihchhuah ni mah se, zawm a hlawh lo thin hle. Nikum kumhlui thlah zan phei kha chu tunhma zawng aiin halpuah/halmawi a hluar niin a lang.
Hmalak dan tur hma taka lo rel lawk hian awmzia thui tak a nei turah ngai ila. Tun atanga halpuah/halmawi lo lut tur lo dan hi thil tha tak a nih rualin, a pawimawh ber zawka chu, halpuah/halmawi hi lo lut tehreng pawh ni se, a ruka zuartute awmin a ruka lo lei pawh awm mah se, a ruka hal lehzel chu thil theih loh a ni a, halpuah leh halmawi chu hmuh hmaih leh a ri hriat hmaih chi a ni lo.
Kum dangah pawh sawrkar leh YMA tangdunin hma han la bawk mah se, rin loh tak tak, mi challang tak takten an lo hal puah dum dum takah chuan, inhmaizahna a na a, dan anga chet lak a lo harsa thin a ni awm e.
Sawrkar thar leh kalphung thar tih a ni ta sa sa, halpuah/halmawi khapna dan kenkawh kawngah pawh hian ‘kalphung thar’ khauh kalpui a pawimawh dawn hle a. Tuna rel lawk ang chuan, Police leh YMA tang hova foot/mobile patrolling neih tur a ni a. Hetah hian YMA branch hrang hrangte hi mahni branch lo theuhah duty ta se, chu chuan awmzia thui tak a neih theih a rinawm.
Traffic rule tha taka zawm thei, silent city tia sawi hlawh thei Mizote hian, krismas zan pawh hi hlaa ‘silent night’ ti satliah mai lova, a practical-a ti ‘silent night’ turin mi tin kan tanho thiam a pawimawh a, kumhlui thlah zan pawh awmze nei leh changkang zawka hman dan kan rel fuh a pawimawh dawn a ni.