Halpuah leh halmawi: |anrual a tul

Home minister K Sapdanga chuan halpuah leh halmawi khap chungchanga Congress party-in an thlawp thu an puang chu a lawm hle tih a sawi a. “Congress party-in kan hmalakna min thlawp thu an puang tawh a, kan lawm hle a ni. Mipui pawhin sawrkar hmalakna hi min tlawp theuh turin kan ngen,” tiin a sawi.
Hetih lai hian, sawrkarin khapna thu a puan hnuah Aizawla police station hrang hrang chuan halpuah leh halmawi kawl an manah case 7 vel a awm tawh a, an thil man hlutzawng hi cheng nuai 20 chuang hu a ni tawh bawk.
Krismas leh Kumthar vuakveta halpuah leh halmawi hal nasat thin avanga boruak chhia insiamin nghawng tha lo tak tak a neih dan hi kan hre vek tawh a. Chumi avanga sawrkarin halpuah leh halmawi a khap kum tin thin dan pawh kan hria a. Hemi chungchanga sawrkarin Khapna Thupek a chhuah nawn awn awn dan pawh kan hre vek tawh a. Chuti chung chuan, sawrkar dan kalh ni bawk siin, kan mihring puite harsatna siam zawngin, dan bawhchhe chungin, hun pui laiin, nasa em emin, halpuah leh halmawi kan hal chur chur thin.
Krismas urlawk zan leh Kumhlui thlah zan, zanlai dar a rik bawr vel darkar chanve/khat chhung boruak chhia siam zawnga bengchheng em ema kan sapatal chiam dan hi han chik chian chuan a HO em em ringawt mai a ni. A hnuah a reh duk a, halpuah halna zen rim a nam vung vung a, chu chu arva-in an thihpui a, damloten an nat zual phah a, damlo na zualte phei chuan hun rei tak an chauh zui phah piah lamah thenkhat chuan thlanmual an pan phah hial thin.
Heng zawng zawng hi kan kumtawp lam boruak hun tawn dan a ni a. Kuminah pawh sawrkarin khapna thupek a chhuah nawn awn awn a, chuti chung chuan dan bawhchhiaa halpuah/halmawi hal tur cheng nuai 20 chuang hu manchhuah tur a han awm nghal pang mai a, tanrual a va han tul tak em!
Hetiang hunah hian, political party hrang hrangte pawh hian sawrkar hmalakna an thlawp thu an han auchhuahpui tliar tliar hian boruak a beng dai thei a, kohhran hrang hrang leh pawl hrang hrangte pawhin sawrkar thlawp thu an han tihrik tliar tliar hian nasa takin kawngro a su thei a. Hetiang hun hi a ni tanrual hun chu.