Hamas commander thatah Israel inchhal

hianni khan Gaza-a tual chhung Hamas commander an that niin an insawi a, Israel leh Palestinian hel pawl hian an inkara inkahhai puan mek chu a bawhchhetu zawkah an inpuh tawn mek zel bawk.
Commander thah tak hi Alaa Al-Hadidi niin an sawi a, Hamas hnuaia production headquarters-a supply chief nia sawi a ni a. Inrinnia Strip an beihna hmun pakhatah a thi niin an sawi a ni.
Hamas chuan an commander thah nia sawi chungchangah hian engmah sawi an la nei ve lo.
Israeli sipaite hian Inrinni khan Gaza hi thlawhna hmangin an bei leh a, hei hi Prime Minister Benjamin Netanyahu-a’n Hamas-in Israeli thunun chinah indo thlawhna an thlawhtir nia a sawi chhan letna a ni.
Inrinnia an chetnaah Hamas member panga an thi niin an sawi a. Gaza damdawi in thuneitute erawh chuan Palestinian 20 vel an thi niin an sawi ve thung.
Israel leh Hamas hi Gaza-a kum hnih an indo hnuah October 10 atang khan US rawtna angin inkahhai an puang a. He inremna an siam hnuaiah hian Hamas-in Israeli an hrente chhuahin Israel pawhin Palestinian lung in tang a chhuah a, Gaza-ah hian Israel kaltlangin puihna tam zawk phurh luh a ni bawk.
Hetih lai hian inkahhai hi a derthawng hle a, ni tin tharum thawhna thleng sawi tur a awm reng a, lehlam lehlam hian inkahhai thuthlung bawhchhiaah an inpuh tawn reng a ni.