Hamas-in Gaza an thunun thin 80% chuang hloh tawh

Hamas-in Gaza an thunun thin 80% chuang hloh tawh
Hamas-a an venhimna lam changtu hotu pakhat chuan Gaza Strip an thunun thin hmun 80% chuang an hloh tawh thu leh chibil pawl hrang hrangin hengte hi an thunun thu a sawi.
Lieutenant colonel hian Hamas command & control system chu thla tam tak Israeli-ten an beih hnuah a tlu chhia a, an pawla politics, sipai leh venhimna lama an inhruaina pawh a buai phah hle tih a sawi.
He thu sawitu officer hi October 7, 2023-a Israel an beih hnua Israel-in a beih let tirh lama inhliam kha a ni a, a hriselna tha lo avangin tunah hian a hna pawh thawk thei lovin a awm.
BBC-in an kawmnaah Gaza-a an pawl tluk chhiat nasat thu hi a sawi a, “A tak takah chuan venhimna lam hi a awm tawk tawk chauh tawh a. Hruai lawk, 95% chuang mah an thi tawh a, a thawk nasa zual phei chu an thi vek tawh a ni,” a ti.
September thlaah khan khatih laia Israel defence minister chuan ‘Hamas sipai inawpna chu a awm tawh lo’ tih sawiin sipai an la neihte pawh hotu awm mumal lovin an che mai mai niin a sawi.
Officer-in a sawi dan chuan Hamas hi kumin kumtira ni 57 chhung inkahhai a awm chhung khan indin that leh an tum tih a sawi a. Politics, sipai leh security council pawh an din thar leh tih a sawi.
March thlaa inkahhai hi a tawp a, Hamas inrelbawlna bitum zui lehin hei hian a tichhiat belh leh niin a sawi a. “Venhimna lam chu a tluchhe vek tawh a, a bo vek tawh a, engmah inthununna a awm tawh lo,” a ti.
“Mipuiin Hamas security apparatus (Ansar) chak tak, Hamas-in Gaza-a ro an relna hmun (complex) an rawk a. Engkim an ru chhuak a, mattress, zinc panel thlengin an ru a. Tumah dangtu an awm lo va, police pawh an awm lo,” a ti.
Venhimna a chhiat tak avangin mi sual pawl leh chi bil pawl inrawlhin an hmun ruak chu an luah ta niin a sawi.
“Anni hian an dang thei che a, an that thei bawk che a, tumah an inrawlh lo va. Mahni duhthua chea rukru vengtu turte pawh Israel-in darkar chanve lek chhungin an bomb a. Engmah himna a awm lo va, Hamas-n an thunun chu ‘zero’ a ni. Hruaitu, thupek, inbiakpawhna a awm lo. Hlawh a tang a, a lo thlen pawhin a la turte chu an thi a, engkim a tluchhia a ni,” a ti.
Hamas hmun ruak hi ralthuam keng pawl paruk chak tak takin an luah mek niin officer chuan a sawi a. Heng pawl hian sum, ralthuam leh mihring an nei niin a sawi a, a bikin chhim lam an awp deuh niin a sawi.
Heng pawl hruaitu zingah hian Yasser Abu Shabab-a chu a langsar ber a ni a, ani hi West Bank-a awm niin Hamas nena inel pawl a nei a. Thla hmasa khan Israel pawhin ralthuamin a pui nia sawi a lo ni tawh.