Hamas-in Israel beihna karah an mi hren pahnih nunna a derthawng an ti

Israeli tank-ten Gaza City-a veng tam tak luhchilha an beihna avanga Palestinian sang tel mangang leh tangkhanga an awm mek laiin Hamas chuan vauna an tichhuak a, khawpuia an mi hren mek zinga pahnih nunna a derthawng tih an sawi.
Palestinian hel pawla an sipai, Qassam Brigades chuan Pathianni khan thu tichhuakin ‘darkar 48 liam ta chhunga sipaiten Sabra leh Tal al-Hawa veng nasa taka beih a nih hnuah Omri Miran leh Matan Angrest te kawltu kan fighter-te kan bepawp thei tawh lo’ niin an sawi.
“Nunna pahnih hi a derthawng hle a, heng laia lo lut sipaite hi chhim lam Road 8 atanga rang taka an chhuah leh tlai dar 06:00 (India-a Pathianni zan dar 09:30) atanga darkar 24 chhung, mi tangte hima lak chhuah tuma beih chhung van sang atanga beihna an chawlhsan a ngai,” an ti.
Hamas hian tun thla tir lamah khan Israeli sipaiten Gaza City an chhu chhe mek leh Palestinian sang tel riltam leh baihvaia an awm tihtawp nan an mi hrente ‘farewell picture’ an lo tichhuak tawh bawk.
Israel chuan Gaza-ah hian mi 48 hren la niin an sawi a, heng zinga 20 hi an la dam a. Mi tam takin mi suat leh mi hren chhungten indo titawp tur leh him taka la lut turin ngen mah se nasa takin an beih chhunzawm zel.
Israeli Prime Minister Benjamin Netanyahu-a sorkar chuan mi hren chhungte leh anmahni thlawptuten an nawrna zawm lova a beih zel avang hian rei tak mi an hren phah an ni tih an sawi.
Hamas political wing chuan Pathianni vek khan thuchhuah siamin an pawl hian palai hna thawk mek, Qatar leh Egypt atangin inkahhai rawtna an dawng lo tih an sawi a. Hetih lai hian US President Donald Trump-a chuan inkahhai a awm ngei tur thu a sawi thar leh tawh thung.
Hamas hian September 9-a US-in inkahhai a rawtna zirchiangtu an hruaitute Israel-in Doha-a thah tuma an beih avangin indawrna hi a tawp rih tih an sawi.
Hetih rual hian Hamas hian an unaute atanga inkahhai rawtna a awm chuan an mite dikna chanvo hum chungin zir chian an inpeih reng tih an sawi.
Israeli minister tam tak chuan Pathianni khan Trump-a’n inkahhai a rawt point 21 chu an duh loh thu leh Hamas chhu chimit lova indo tihtawp chu an duh lo tih an sawi.
October 7, 2023-a Hamas-in Israel chhim lam beia Israel-in a chhan letna kal zelah hian Palestinian 66,000 chuang an thi tawh niin Hamas health ministry chuan a sawi.