Hamas-in Israel inkahhai rawtna hnawl
Hamas-in an ralthuam an tun theih nana Israeli-ten Gaza-a chawlhkar ruk chhung inkahhai puan a rawtna chu hel pawl hian an hnawl.
Palestinian hotu sang pakhat chuan indawrnaah hian Hamas-in an mi hren la damte chhuah tura tih a nih laiin an lamin duh ber, indo tihtawp emaw, Israeli sipaite inhnuhdawh emaw a tel lo niin a sawi.
Israel chuan kar hmasa khan inkahhai tura rawtna hi palai hna thawktute hnenah an thehluttih a sawi a, Prime Minister Benjamin Netanyahu-a’n Washington-a US President Donald Trump-a a hmuh hnu lawkah a ni.
Hamas palai, chief negotiator Khalil al-Hayya chuan Egyptian intelligent thuneitute chu Cairo-ah a hmu zui bawk.
Palestinian hotu lian chuan, “Israeli-ten Egypt kaltlanga an rawtnaah hian Hamas ralthuam tunna tur telin Israeli-ten indo an tihtawpna tur emaw, Gaza atanga an inhnuhdawhna tur emaw a tel lo. Hamas chuan a vaiin a hnawl a ni,” a ti.
Tun hi Israel-in inkahhai a awm theih nana Hamas-te an ralthuam dah vek tura a tih vawi khatna a ni.
Palestinian hotu chuan Israel hian mi hren chhuah chauh ngaihtuahin indo zel an tum niin a sawi a ni.
Gaza-ah hian mi hren 59 an la awm nia hriat niin an zinga 24 chu an la dam.
Tun hnaia an chhuah tawhte chuan leihnuaiah dah an ni a, thenkhat chu an hriselna a derthawngin an hliamte pawh enkawl an ni lo niin an sawi.
Hamas chuan an mi hrente hi chhuah vek an inpeih tih an sawi a, chumi tur chuan indo tihtawp leh Gaza atanga Israeli inlak chhuah vek an phut ve thung.
Egypt chuan rawtna thar hi siam danglam hretin Hamas hnenah a thlen tawh a, an chhanna ngaihchan leh mek nia hriat a ni.
Israel hian inkahhai an puan tawh a tawp hnu, March 18 atang khan Gaza bei leh tanin Hamas an bitum niin an sawi a. Hemi hnuah hian mi 1,630 vel an thi leh tawh a, thla 18 an indo tawha thi chu mi 51,000 an tling tawh niin Hamas enkawl health ministry chuan a sawi.
October 7 khan Hamas hian Israel beiin mi 1,200 an thah bakah mi 251 chu hren atan an hruai a, hemi phuba la hian Gaza hi an bei ve ta a ni.
Inkahhai rawtna thar a awm mek lai hian Israel chuan sipai chakna hmangin Gaza a bei chhunzawm zel.
Thlawhna atanga Khan Younis-a field hospital kapin a vengtu thiin mi dang pakuain hliam an tuar bawk niin damdawi in chuan a sawi a. Israel Defense Forces (IDF) chuan engmah a la sawi ve lo.
UN agency chuan Gaza-a chengte dinhmun chu a chhiat lai ber a thleng mek tih ans awi ve bawk a. Israel-in Palestinian territory-a puihna lut tur chu chawlhkar ruk a dang ta a, a danchah rei ber a ni tawh.
UN agency-te chuan Israel-in Gaza-ah rei tak daih ei tur a awm nia a sawi chu a dik loh thu sawiin kawng dan chu international humanitarian law kal a nih thu a sawi.
Israel prime minister chuan mamawh lak luhna dan hi Hamas-ten an mi hren an chhuah nana nawr nan leh March 1 atanga tawp ta inkahhai pawh sei a nih theih nan a nih thu a sawi.
Indona kal mekah hian January khan inkahhai puangin mi hren 33 chhuah an ni a, an zinga mi 25 hi an la dam a. Chawlhkar ruk chhungin Israel-in a man Palestinian lung in tang 1,800 vel chhuah an ni ve bawk.