Rempuia R. Lûtmâng
-- Advertisement --
Tun hma chuan driver ni lo zawk hi handyman tih a ni thin. ‘Handy’ chu ‘hman tangkai theiha lo awm hnaivai remchang’ a ni mai ang chu, handy hian mihring chauh a kawk hran lo.
Hmanlai Jeep chu pawna chhuaha a hma lam atanga herh nun a ngaih châng a awm. Motor khalhtu, driver tan a steering vuan chunga Jeep herh nun chu a ngaihna a awm lo, pawna chhuah daih a ngai. Kawng diaka a tân pawhin driver seat-a thu chungin, motor khalh pahin a hnung a atangin a nawr a theih loh, mi dang tirh mai tur remchang an awm ve a ngai.
Motor lian, thil phur rit phei chu kawng chhuk chhoa a din dawnin a ke lo kam ngei ngei a ngai, a lirh mai lohna turin. Chu pawh driver tan tih theih a ni lo. An inher dawn pawhin, kawng a zîm thin si a, a hnung tawlh tur chin hi driver-te enpui an ngai nasa hle. Chutiang ti tur, tirh leh koh mai theih an awm a ngai.
Kawng laka eng emaw rokhawlhna a awmin, an siam theih chi a nih chuan driver lo pui zung zungtu tur an awm a ngai bawk, mahni chauha tih mai theih loh apui a tam mai.
Driver-ina a tih mai theih loh, a tana tih remchang lo, tih ngei ngei ngai thin si, hna tesep neuh neuh lo ti thei leh lo ti zeltu tur kha an awm a ngai a, chutiang chu an awm ta reng a, chu chu ‘handyman’ an ni.
Sap handyman leh Mizo handyman hna thawh a inang kher lo ang, anni chuan in leh a vela eng emaw tih a tûl chânga koh mai theihah te an hmang. Handyman tan thawh tur tê lua a awm lo. Koh man, hna thawhtir man châwiin an ko thin. Chutiang chu Sapin handyman an tih chu a ni. Chutiang tho chuan motor zuitu, thawh tur tul tê lua awm loa tih tur tul thawktute kha handyman kan ti ve a ni.
Kan thupui ve thung khi le? Khi khi a lo chhuahna a la rei lo mai thei. Tun hma khan Jeep leh Jonga te kha a hma lam atanga herh nun a ngai fo mai a, a herh nunna chu handle an ti. Chu chu hre fuhin, a handle khawihtu an nih avang khan tlaikhawhnuah, Jeep leh Jonga pawh hmuh tur a awm meuh tawh loh hnuah ‘handleman’ tiin an phuah leh hnuhnawh a nih a rinawm. A handle lo herhtu an nih avang hian ‘handleman’ tih an ni ngai lo, tawng dik lo a ni; hna tesep lo thawktu, mi tangkai an nih avang hian ‘handyman’ an ni zawk. ‘Handy’ chu lo awm remchâng, lo awm hnaivai, awlai taka hman mai theih tur sawina mai a ni a. Chutiang mi chu an nih avangin ‘handyman’ an ti a ni.
Tun hnai hian ‘handleman’ tih hmang an awm ta zauh zauh a, hei hi Sap tawngkam pangngaia mi a ni lo, Mizo tawng pawh a ni chuang lo, hnam hming a ni daih, German hnam Handelsman atanga lo kal a ni mai thei.
Pu Vanneihthanga Vanchhawng khan ‘handleman’ a ti, a thuziak sei deuhah ka hmu tawh. Pu Harry Khiangte pawhin inthlan hma deuha MNF a zawm khan, a thu sawi an theh darhah ‘handleman’ tih a hmang. Ani hian a hmang tak tak nge, a thu sawi khârchhâwngtute’n a sipel an thlaksak zawk, kha chu kan hre lo.
Mizo tawngah chuan ‘handyman’ a ni mai a; ‘handleman’ an awm lo. Kan duh aleh ‘han-di-men’ pawh kan ti ang chu.