Handstand push tihnem thei record siam

Hetiang record siam tur hi chuan mi in-fit zek zawk tak nih chu a ngai ve ang. Georgia a cheng Sandro Parulava chuan handstand push up tihnem thei ber recorda siam. Sandro hian a zawnin handstand push up vawi 61 a ti thei a, a hmaa hetiang record, 2019-aUkrainian Viktor Nabok siam, vawi 52 handstand record chu a rawn khum ta a ni.
Handstand push up tih chuan, an kut pahnih chu ke anga hmangin lu lei vit zawngin an innem kang a, an ke chunglamah an dah ve thung. Hetiang position-a awm chung hian an ban chu kiu-ah tithlepin an awp hniam a, chumi hnuah ban an timar leh thin. Hetiang hian a zawnin vawi 61 a ti thei a, Sandro hian record a siam ta a ni.
Record siam tur hian an balance an hloh a thiang lo a, an kutphah tih loh, an ke emaw an taksa peng dang eng pawhin chhuat emaw, bang emaw, thildang engmah a tawk thiang lo a, an ban chu kiua an tihthleh hma leh tihmar leh hnuah a char at at tur a ni bawk.
Sandro chuan hetiang record siam tur hian kum thum chhung rim takin a training niin a sawi a, nikum bikah phei kha chuan kar khatah ni ruk tal a training ngei ngei a, a ban leh dar dinglam a tihliam deuh chung pawhin nikhatmah a training a pumpelh phah chuang lo niin a sawi.
Tun hi Guinness World Record a siam vawi khatna a ni a, record dang pahnih siam leh thuai a tum niin a sawi a, record siam a tum leh tur chu minute khat chhunga handstand push up tihnem ber (he record kawl mektu chu Feras Alahmad, Syria a ni) leh minute thum chhunga handstand push up tihnem thei ber (he record kawl mektu chu Belarusian Siarhei Kudayeu a ni) te a ni.