Hanhsin KUt

Tharbawihi Colney

Tukthuan kan ei laiin ka nauin, “kar leh chu Hnahsin Kût han chhim ve tur a ni,” a ti a. Ka pa rawn tawng chhuak vatin, “Chutiang a awm ngai lo, thil ni lo lo hi sawi thin suh u, Mizo chuan Pawl Kût, Chapchar Kût, Mim Kût kan nei, a bak a awm lo. Thil hi in phuahchawp mai mai thin a, kan Kût pawimawh te inti dazat zo ang e”, a ti ta hrep a. (Hnahsin Kut an siam tih hre ve hek lo le)
Ni e, a dik reng mai, ka pa ngaih dan hi ka thlawp a ni. Keimah ngei pawh Hnahsin Kût han en tura Champhai kal chu ka tum ru ve tho.
Ni 8, October khan Champhai chu ka han kal ta a, zanlaiah kan thleng a, a tuk khua a lo var chuan a hmasa ber atan Hnahsin Kût an buatsaihna Leilet phaizawl pan chuan kan kal nghal a. (Chipchiar takin kan fang hman lo a, ka hmuh leh hriat pawh a tlangpui chauh ka rawn tarlang dawn a ni.)
Leilet zawl tawntirhah chuan Gate lian tak siamin HNAHSIN KUT tih an lo tar a, a veilam kawng sirah chuan I LOVE YOU tih leh LOVE SIGN mawi tak leh lian takin an siam kulh mai a, a sen paw phat mai bawk a, chuta tang chuan thla kan la tan a, a nuam tan hle mai.
A hmunpui deuh lamah kan phei zel a, Aui Garden gate tih a lo awm a, kan lut a. Veilamah chuan Hnahsin panna kawngpuiin a pawh, khawchhak Pi pu hmun hlui thlalak chi hrang hrang an lo tar teuh a, a hmuhnawm em em mai bawk a, Mizo Writers Association ten kan han tlawh tawhte an nih hlawm avangin lung a ti leng thar hle mai.
A piah lawkah chuan thlalakna (Photo Booth) an siam a, thla kan va la leh a, kan hnung lamah chuan Champhai zawl leilet a lang cham duai mai a, a hring êng phut bawk a, a mawi chiang a nia aw. Hnahsin Kût In lem leh Stage an siamah te chuan thla kan la zel a, ka rilrua awm ta chu, a huaihawttu/a buatsaihtu (Organizer) te hah dan tur te, hun rei tak atanga Hnahsin Kût buatsaih tura an urlawk nasat dan tur leh, hma an lo lak dan tur te, a hautak dan tur te, sum leh thâ a ngaih tam dan tur te, a buatsaihtute inlungrual a ngaih dan tur te, thil an ngaihtuah chikimzia te, mahni sum an sen ral nasat turzia te ka ngaihtuah neuh neuh a, hetiang thil ropui, Zoram nghawrnghing thei an siam chhuak a, an ngaihtuah chhuak thei hi an ropui hlawm mang e aw, ka ti vawng vawng mai.
Aui garden atangin kan chhuak a, a lehlamah kan lawn chho a, ei leh in tuihnai tak tak duh duh ei tur a awm a, Mizo thuam leh thil chi hrang hrang, khaw hrang hrang a miten an lo zuar bawk a, a va tha tak em! Sumdawnna hmunpuiah an let a ni ringawt, kumkhaw daih nise ka lo ti rum rum mai. He Hnahsin kut rei lote chhunga miin hlawkna a lo tel tur hi ka lawmpui takzet a, a buatsaihtute pawh hian rem an va hre tehlul em!
Kan inei puar hnu chuan Mualbuhvum lamah kan va phei leh a, tlang zawl kan han thleng chu a nuam dangdai hle mai. Boruak a veng halh mai a, a hmun hi a va fianrial viau a, tunlai tawng takin a romantic khawp mai. Chutah chuan YMA Sub Headquarter hruaitu hluite an lo awm a, anni nen chuan hun rei lote chhung kan inkawm a.
Pu C. Lalremliana Ex President (Pu Marema): Khawi atanga lo kal nge in nih?
Keimah: Aizawl atangin.
Pu Marema: Hnahsin Kut in rawn chhim ve em ni?
Keimah: Aw ni e, Ka pu, Hnahsin Kut hi eng nge in siam chhan le?
Pu Marema: Tourism hip nan leh tunlaiin thalai chu sawi loh, nu leh pate pawh hian han lên harhna tur hi kan mamawh em em a, chung atan chuan a ni ber.
Keimah: In ti tha hle mai. A nih leh maw, Hnahsin Kut hi Hnahsin hmunah kan hmang a, Pâwl Kut kha buh pâwl zingah kan hmang lo a, Chapchar Kut pawh chap zingah kan hmang lo a, Mim kut lah Mim hmunah kan hmang hek lo a, nangni hian Hnahsin hmunah tihian in buatsaih a, hei hi eng nge a chhan, Field zau tha tak in nei tho si a?
Pu Marema: Hnahsin par vul lai tak a ni a, Champhai boruak nawm lai tak a lo ni nen, a hmunhma hi a mawi bawk si a, chuvanga hmang chu kan ni mai ang.
Keimah: A lo nih chu! Pakhat leh chiah aw, Sikul naupang exam quetion-ah hian “Mizo Kût hming han sawi teh,” tih chhuak ta se, Hnahsin Kût hi an rawn sawi mai ang em, rawn sawi ta se a pawi i ti ang em?
Pu Marema: Mizo Kût te hi phuahchawp vek tho an ni a, kan phuahchawp ve leh a ni mai a, nakin zelah chuan an la telh mahnâ le, a ti a.
Kan hmanhmawh tlang si a, kan inkawmna chu kan ti tawp ta a ni.
Râl atanga kan lo thlir dan chuan Hnahsin Kûtah hian Champhai leh a chheh vel khuate chu kal vek turah kan lo ngai mai a. Mahse, a lo ni lo khawp mai, “Mipui an thuhmun fo thei lo”, tih hla ang kha a ni. |ul ti lo fe fe, ngaisang lo tak tak an lo kat ve nuk tho mai.
Aw le, Aizawl atanga Hnahsin Kut chhim tura han chho ve ta chu ka hmuh dan leh ka ngaih dan tlem ka’n sawi ve ang e.
Hnahsin Kût hi a thatna lam ka sawi nual tawh a, tunah chuan tha lo ka tihna thenkhat ka’n sawi ve ang e.
1. A hming hi an phuah fuh lo ka ti deuh, Anthurium Festival an tih ang hian Hnahsin Festival ti zawk se ka ti. Mizote hian Kût tih hi kan ngai ropui bawk a ni ang! Tunah phei chuan Kût narân kan ngah tawh hle mai. Kan Kût neih bak hi kan la phuah belh zel hmel si a, nakinah phei chuan Derhken Kût, Nuaithang Kût, Nihawipar Kût, Chhawkhlei Kût Nauban Kût te kan la ti zel ang a, kan KÛT ropui neih kan ti hlu lo zo ang tih ka hlau khawp mai. Tunah pawh hian Kurtai Kût, Bawkbawn Kût tihte leh a dang dang pawh a awmin ka hria..
2: Hnahsin Kûta kal leh a hlutpuitute hi a tlangpuiin thalai rual an ni. YMA General Conference te, KTP General Conference leh Inkhawmpui lian dangte pawh hi tha hle mah se, kum tina hman ngam a ni meuh tawh loh avang leh, a hautak em avangin kum khat danah te hman a ni tawh. A chhan chu, Thil tha hi a thatna anga kan hman thiam loh chuan hman loh hi a la tha zawk thin. Chuvangin, Hnahsin Kut pawh hi a thatna nge tam ang a, a that lohna tih hi buk tham fe a awmin ka hria. Chuvangin, thalai sahawk rual hlim hlawpna siam belh hi tul ka ti ve lem lo.
3: Ruih theih thil chi hrang hrang, tih chhin châkna leh tih chhin bul intanna hi hetiang hunah hian a ni thei a, ruih theih thil a hluar duh viau bawk. Tin, zan lamah Concert-te buatsaih a ni a, harhfim loa hmang a tam zawk an nih ka ring rum rum mai, intih palh/intih buai/inhliam palh awm thei a ni a, a tha ka ti lem lo bawk.
4: Hnahsin Kut hi zawngchhang zel tlak ka ti lem lo bawk. Zan boruak zo lo tak tak an awm niin a lang. Lênchung nau lawm an sawi ang mai an ni ang tih ka hlau.” An hlim lutuk khan an nau lawm ber kha an hre chang tawh lo a, an chil hlum daih mai a, khawvar hnuah an hre chauh, an ti. Chumi ang mai chuan Hnahsin Kut hmangtute pawhin an lawm ber Hnahsin kha an chil chhe nuaih mai an ti a nih kha…

HNAHSIN KÛT BUATSAIHTUTE (ORGANIZERS)

Chairman: Dr. Samuel Laldinthara
Vice Chairman: Lalrammawii
Sectretary : Felix Lalruatsanga
Asst Secretary : Sr RE Lalremruata
Treasurer : Lalrinmawia Hnamte
Fin. Secretary : Dr C. Lalnunzira

Tin, Sub Headquarters hruaitu hluite hi – C. Lalremliana, R. Lalhluna, C. Lalawmpuia, V Hrangzika leh VL Chama te an ni.