Hantavirus a darh chiam a hlauhawm loh – WHO

Hri lengin a tihbuai cruise ship atanga a tawp nana passenger-te chhuahtir an nih hnuah hantavirus chu nasa zawka a darh ‘hlauhawmna a awm lo’ tih UN health agency hotuin a sawi.
World Health Organisation (WHO) hotu, Tedros Adhanom Ghebreyesus-a chuan ‘thil awm dan a la danglam thei’ tih a sawi lawk thung a, hri kai hmuh chhuah tam zawk an la awm thei.
MV Hondius hian Thawhlehni khan Spain-a Tenerife thliarkar a chhuahsan a, Dutch lawng chawlhhmun, Rotterdam pan turin a kal mek a. Thawhlehni vek khan a bul lawk, Eindhoven-ah hian passenger chhuahpui hnuhnung ber thlawhna pahnih, mi 28 phur chu a tum tawh bawk.
Lawnga chuang mi pathum an thi tawh a. Spaniard pakhat leh French mi pakhat, a hmaa an rama hruai haw tawhte chuan hri an kai tih hmuh a ni zui a. WHO chuan hri kai hi mi pakua an hmu chhuak tawh a, mi pahnih dang rinhlelh an la awm bawk.
Thawhlehni-a Madrid-a thuthar lakhawmtute a kawmnaah Ghebreyesus-a chuan, “Tun dinhmunah chuan hri leng nasa zawk a intan thei tih hriatna a la awm lo,” a ti.
“Mahse, thil awm dan hi a danglam thei tih chu a chiang a, hri hi a lang chhuak tura a insiam rei tak ngaihtuahon karleh lamah chuan a kai tam zawk kan hmu mai thei,” a ti.
Cruise ship atanga hri leng hi tihtawp tuma ‘kan hna thawh a la tawp lo’ tih a sawi bawk.
Hantavirus hi bawlhhlawh atanga kai a ni tlangpui a, WHO chuan lawnga chuang thenkhatin South America-a an kai, Andes strain bik hi mihringa inkaichhawn theih a ni a. WHO hotute hian a hmain hri leng lian tham a thlen theihna chance a tlem hle tih an lo sawi tawh.
Thawhlehni khan Spanish health ministry chuan lawng atanga lak chhuah hnua Madrid-a khung hran mek mi 14 zinga pakhat chu hantavirus a vei tih a sawi.
Dutch lawng hi Rotterdam pan turin ni ruk chhung a kal a ngai dawn a, May 17 tlaiah a thleng dawn a. A chuang lak chhuah hnuhnung hnuhnung paruk – Australian pali, Briton pakhat leh New Zealander pakhat leh thawk thenkhat chuan Thawhlehni khan lawng hi an chhuahsan.
A hmain MV Hondius-a chuang leh thawktu mi 122 chu sorkarin a thlawhna ruahman hmangin Netherlands leh an ramah an hruai haw hlawm tawh a. Oceanwide Expeditions chuan thawktu 25 leh damdawi thiam pahnih an la chuang tih a sawi.
MV Hondius-ah hian ram 23 atangin passenger leh thawktu 147 phurin April 1 khan Ushuaia, Argentina a chhuahsan a ni.