Harris-i’n hmalam panna kawng thar tiam

Vice-President Kamala Harris chuan American te tan ‘hmalam panna kawng thar’ tiamin Democratic presidential nomination a pawmfel ta a, inlungrualna leh voter te chu Donald Trump hnawl turin a ngen bawk.
November inthlan chu ‘tun hma huna khakna, lunghnurna leh inthen hran tuma inbeihna hnuchhawnna tur a ni’ tiin Democratic convention kharna neihah a sawi a.
Kamala Harris hian history siamin Asian-American hmeichhia major party presidential ticket chang hmasa ber a ni a.
Kum 59 a upa Harris chuan President nilai Joe Biden an White House luahzui zel tuma beih a tum tawh loh thu a puan hnuah Democratic nominee a ni zui a ni.
Poll lakah Harris leh Trump chu an inbei tawk thial thial hle a, Harris chuan minute 45 chhung thusawina a neih chu a political career a hun pawimawh ber niin America-ah tu nge a nih a inpholanna a ni ber.
Harris chuan ‘working-class neighbourhood a seilian’ niin Jamaican leh Indian immigrants fanu a nih thu a sawi a.
Prosecutor a lo nih tawhna chu sawi langin Harris chuan a thusawiah minute eng emaw zah chu a nu boral tawh Shyamala Gopalan Harris chungchang sawi nana hmangin a nu chu a nun leh political career atana mi pawimawh a nih thu a sawi a.
“Rorelna dik lo a awma phun ngai lo tur leh chetla zawk turin min hrilh thin a ni” tiin Kamala Harris chuan a sawi a. A unaunu kum 57 a upa Maya pawhin thusawina neiin an nu chu ‘hmahruaitu’ tia sawiin ‘beiseina sang tak min nei a ni’ a ti bawk a.
“Kan duh engkim tithei turin min chawi seilian a ni” tia sawiin, ‘chu chu American story a ni’ a ti bawk.
Harris chuan America a aspiration family a ngaih pawipawh thu sawiin ‘opportunity economy tha tak mitin te inel theihna leh hlawhtlin theihna tur’ siam a intiam a.
Harris chuan ‘American housing shortage tihtawp’ intiam bawkin entrepreneur te tanpui a intiam bawk a. Mahse, tun administration an kalpui mek leh amah pawh a telna in chung te tana policy an siam leh neih te engmah sawilanna a nei lo thung.
Trump chuan Kamala Harris thusawi chu a social media platform Truth Social hmanga sawisel nghalin Kamala Harris chuan White House luah kum li a awm chhungin eng nge a tih a ti thung a.
“A phunna thil te kaihhnawihah eng vangin nge tih a neih miah siloh?” tiin Trump chuan a sawi.
Kar nga kalta kha chuan Democrats te chuan an party extragavanza chu President Joe Biden behchhana kalpui turah an inngai kha a ni a, mahse a kum upatna leh Trump hneh thei dawn lova ngaihna avangin rinhlelhna an nei zui ta kha a ni.
July thla tawp lamah thil inthlak danglam thlengin Biden chuan debate neiha a chetchhiat viau hnuah party chhunga nawrna nasa tak avangin President nonimee a nihna atangin a inhnuhdawhsan ta a ni.
Biden inhnuhdawh hnu lawkah party leaders, delagates leh challenger dang te chuan Harris candidacy chu an thlawp zui nghal a. Chicago khawpuia Democratic Convention neihnaah hruaitu lawk hrang hrang te chuan Kamala Harris chu an thlawpna an tilang zui ta a ni.
“Democrats te ah phurna nasa tak thlenin November thla thleng a awh tawh dawn a ni” tiin Georgia delegate Edward Bohannan chuan a sawi a. “Tun ang renga inthlana phurna nasa hi a la awm lo, mipui te an phur tlang takzet a ni” tiin a sawi bawk.
Democratic National Convention (DNC) neihnaah hian milangsar tak tak inpholangin Barack Obama leh Michelle Obama te, Bill leh Hillary Clinton te, Oprah Winfrey te bakah Republican defector te pawh an inlan a ni.
Democratic National Convention hian ni li lawih awhin speaker te chuan gun violence chungchang te an sawi nasa a, gun violence hi Harris in California a top prosecutor a nih laia a buaipui leh vice-president a nih hnu pawha a buaipui zui a ni a. Biden chuan nikum khan gun violence tihtawp a nih theih nana hmalakna tur duangin Harris chu sulsutu angin a dah zui bawk a ni.
DNC ah hian US congresswoman hlui kum 2011 a Airzona a silaia kah chu a pasal Senator Mark Kelly nena inlanin gun safety chungchang a sawi bawk a. Georgia Congresswoman Lucy MacBath, silaia a fapa kahhlum ni bawk chuan gun restriction chungchangah thusawi a nei bawk.
Michigan Governor Gretchen Whitmer, Democratic rising star ni bawk leh Harris in vice-presidential candidate atana a enthlak zinga tel chuan Harris chu ‘khauh, enchhin dawl zo’ tiin a sawi.
Adam Kinzinger, Republican Congressman hlui tuna Democrats a inlet ta pawhin Trump beih nana hmangin, “Kan constitution leh democracy hum him hi conservative thupui a ni thin” tia sawiin Kingzinger chuan, “Republican thupui ber a ni thin a, mahse, Donald Trump chuan Republican Party thupui ber chu a rek bet ta a ni” tiin a sawi a. “Keini ang bawkin Democrats te chu ram leh hnam hmangaih an ni” tiin a sawi bawk.
DNC organiser te chuan Chicago a Gaza indona a White Policy duhlohna an lantir hnuah Palestinian tena thusawi an dilna chu an hnawl bawk.
Harris chuan Palestinian lungawilo te chu hming hmerhin a sawi lang lo va, Gaza chungchang erawh sawiin mahse US chuan Israel in ‘right to security’ a neih chu humhim a ni tlat dawn tia sawiin Palestinian te chu ‘zahawm leh zalen’ a nung turin a ngen bawk thung.