US Vice-President Kamala Harris chuan White House campaign atana rally a neihna hmasa berah Donald Trump chu bei nghalin November thlaa US president thlan tur chu prosecutor hlui leh misual inbukna tiin a sawi.
Battleground state Wisconsin-a mi 3,000 vel pungkhawm hmaah Harris chuan a Republican opponent Trump chu mi bumtu tia sawiin a hrem tawh a ni a ti bawk a.
Hetih lai hian Trump chuan Kamala Harris chu border record a neihah sel thungin ‘Dawt heh Kamala Harris hian a khawih apiang a tichhe zel’ tiin a sawi ve thung.
Kamala Harris hian a hma lawkin Demoratic delegates te thlawpna hmuin party nominee a ni ta a.
Pathianni kalta khan President Joe Biden chuan presidential race atanga a inhnuhdawh thu a puang thut a, a chhan ber pawh Democrats te leh donors tena June thla chawhnu lama Trump nena an debate neiha a chet chhiat em avanga inhnukdawk tura an nawr vang a ni.
Biden inhnuhdawh hnuah Harris campaign team te chuan darkar 36 chhung lekin donation $100 million chuang an hmu nghal a ni.
Chu mai ni lovin Reyters leh Ipsos tena national poll an lakah Harris chuan Trump chu 44% hmu a khumin Trump chuan 42% a hmu mek a ni.
Milwaukee a thusawina a neihah Harris chuan California a attorney general a nih laia a tawnhriat sawiin, “Mi suasam ching chi hrang hrang ka hmachhawn tawh” tia sawiin, “Hmeichhia sawisak ching te, consumer te bum thin mibum ching te, an hlawkna duhna avanga dan bawhchhia te” tiin a sawi a.
“Chuvangin, Donald Trump te ang type hi ka hria ka tih chuan min ngaithla mai rawh u” tiin Harris chuan a sawi a, “He campaign ah hian ka tiam duh che u chu kar tin ni tinin Trump lakah ka record ka thehchhuak ngam a ni” tiin a sawi.
Trump thung chuan a social media platform Truth Social-ah poll pakhatin Harris chu US history a vice-president lar lo ber tia an sawi thu a sawi a.
Chu mai bakah non-partisan congressional scorekeeper GovTrack te chuan Democratic senators zingah pawh left-wing awn ber an tih thu a tarlang bawk.
Harris chuan a thusawiah liberal lam hawia hmalakna tur sawiin gun control leh abortion access chungchang mai bakah child poverty leh union rights leh affordable healthcare te pawh a sawi a.
“Zalen leh inhriatthiamna leh rule of law dinchanna a chen kan duh nge, buai nuai nuai, hlauhna leh huatna a khat ramah chen kan duh zawk” tiin Harris chuan a sawi.
Harris chu tun dinhmunah chuan a boruak a tha rih hle a. Mahse, pollster Tony Fabrizio an memo a tihchhuahah thung chuan Harris in voter te nena ‘honeymoon’ period a neih chu a reh mai dawn a, ‘biden a partner leh co-pilot a nihnaa a role thlurbingin a awm tawh ang’ tiin a sawi.
Trump campaign lam chuan Harris chu US-Mexico border a illegal immigrants te dang thei lovah puhin chu mai bakah crime leh inflation sangah Biden-Harris administration chu an puh bawk.
Trump team te chuan Harris chu tualthattu, pawngsualtu leh pawikhawihtute bail out ah puhin Israel hmusit leh Joe Biden ‘cognitive decline’ chungchanga US mipui te bumah an puh bawk.
Reporter tena an kawmnaah Trump chuan Harris chu, “Radical left mihring a ni a, he ram hian he ram tichhe tur radical left mihring a mamawh lo” tiin a sawi a.
“Biden ai chuan a awlsam deuh hret ang a chhan chu tlemin a mainstream deuh zawk a, mahse, nasa a ni lo” tiin a sawi bawk.
Trump chuan September thlaah Harris nena debate turah a inhawn thu sawiin, “Engmah remtihna kan la pe lo va. Joe Biden nena debate kha ka rem ti a, Harris nena debate pawh ka duh ang, a danglam dawn lo” tiin a sawi.
Democrat lawmaker tam ber te House Minority Leader Hakeem Jeffries leh Senate Majority Leafer Chuck Schumer te pawh Harris candidacy chu an thlawp thu an sawi tawh a.
Entertainer lar zingah George Clooney, Barbara Streisand leh Jamie Lee Curtis leh Hollywood star dang te pawhin an thlawp thu an sawi a, chu chuan a campaign-ah donation tam zawk a hmuh phah thei a ni.
Harris leh Trump inbei zui nghal
Get real time updates directly on you device, subscribe now.
Prev Post
Next Post