Harsa takin Liverpool an chak

Pathianni zana English Premier League khelhah champion lai Liverpool chuan table hnuai lama awm Nottingham Forrest lakah harsa takin hnehna an chang a, top 4 huang an hnaih ve deuh deuh zel. Liverpool rual hian Fulham leh Crystal Palace ten hnehna an chang ve bawk.
Liverpool leh an mikhual Nottingham Forrest te hi an inhnehtawk viau a, goal pawh a lut har hle. Goal thun tumin an innawr tawn nasa hle a, goal thun theihna hun tha pawh an nei ve ve. Forrest hun tha neih chu si nghak Alisson Becker chuan a tihtlawnsak a, an team a chhanhim.
Hun rei tak chhung goal lut a awm theih loh hnuin Reds tan Alexis Mac Allister chuan hun tawp dawn hnaihah vanneihthlak ang reng takin hmahruaina goal a thun. VAR rawn a nih hnuin McAllister goal thun hi handball vangin hnawl a ni a, Robinhood-a te khua Nottingham Forrest an him hlauh.
Hun pangngai a zova, hun pek belh tawh a tawp leh tep tawh laiin Nottingham Forrest tlarhnung an che fuh lova, uiawm takin goal an chhuah. Buai deuh nuaih nuaih karah McAllister chuan hnaite atangin chiang zetin a pet goal a, sawisel rual lohin hmahruaina goal a thun ta nge nge.
McAllister goal thun hmang hian Nottingham Forrest lakah harsa takin hnehna an chang a, point thum hlu tak an hmu. Point thum an hmuh hmang hian top 4 huang an hnaih leh zual a, paruknaah awm mek mahse palinaa awm mek Chelsea nen an point hmuh zat a inang a, point 45 ve ve an hmu. Thawhtan zanah Manchester United in Everton lakah point an hlawhchhuak a nih chuan United hian palina an luah ve thung ang.
Pathianni zana inkhel dangah Fulham chuan mualneitu Sunderland chu 3-1 ngawtin an hneh. Fulham tan hian Raúl Jiménez chuan goal hnih a thun a, Alex Iwobi chuan goal khat a thun ve bawk. Inkhel dangah Crystal Palace chuan an mikhual table mawngphaha awm mek Wolves chu 1-0 in an lo hneh ve bawk.