Harsa takin Pacers an chak

Zirtawpni zing khan NBA Finals 2025 game khatna khelh tan a ni a, inkhel hmuhnawm takah hun tawp dawn tepa Tyrese Haliburton point thawhchhuah hmangin Indiana Pacers in mualneitu Oklahoma City Thunder an hneh.
Final thawhkhatnaah hian mualneitu Oklahoma City Thunder in bul an tan tha a, quarter khatnaah point 9 in an chungnung nghal. Thunder hi quarter hnihnaah pawh an khel tha chhunzawm viau a, point thumin an chungnung zui leh a, point 12 a hmahruai chungin chawlhlawk an hmang.
Chawlhlawk hmain hnufual zawk ni ve ve mah se Pacers in chawlhlawk an hmang tangkai a, chawlhlawk hnu lamah chungnung zawk an ni ta ve ve thung. Pacers hi quarter thumnaah point thuma chungnung hramin Thunder nen an inkar an tizim a, phurna thar an neih belh bawk. Quarter linaah an inbei tawk zui hle. Hun tawp dawn tep thlengin mualneitu Thunder in hma an hruai a, an mualah an chak ngei a rinawm hman viau. Dinhmun chhe zawka ding chungin Pacers an beidawng mai lova, an hnual hek lo. Huaisen takin an khingpuite an bei let char char a, hun tawp dawn tep tak tak, second hnuhnung berah Tyrese Haliburton chuan point pawimawh zet mai a thawkchhuak a. Point khata an khingpuite lehthalin chak zawkah an tang ta daih a ni.
An mualah ngei point 111-110 a an tlawm mai hi Oklahoma City Thunder hian an ui hle ngei dawn. Quarter lina tir lamah point 15 te in hma an hruai hman zak zak a. Second 12 chauh a awm tawh laiin point hnih thawhchhuah theihna hun remchang an neih an hlah leh tlat bawk nen mak tak maiin an mualah an tlawm a, an hrilh hai hle. Game hnihnaah tha zawka khel turin an muala an tlawmna hian zirlai thar a zirtir ngei ang. Pacers laka an tlawm tum hian Thunder tan MVP thar Gilgeous-Alexander chuan point 38 lai a thawkchhuak a. Indiana Pacers tana point thawkchhuak hnem ber Pascal Siakam chuan point 19 chauh a thawkchhuak ve thung.