Harsat chhan – Dan zawm loh vang

Eng nge harsatna kan tawh chhan ber ni thin? tih zawhna hi a chhanna dik ber hriat a har maithei; chutih laiin harsatna thlen chhan ber hi chu ‘dan zawm loh vang’ tia chhan ni ta se, a fun kim ber mai awm e. Kan ramin harsatna a tawh chhan hi han thlir vang vang ila, a tawpah chuan dan zawm loh vang hi a lo ni leh thin.
Hmun dangah kawngpui tha tak tak an nei thei a, enga tinge Mizorama kawngpuite hi fur khat daih pawh a nih ve thin loh kan tih chuan, kawngpui siam dan tur a nihna ang thlapa zawm a nih loh vang te a lo ni thin a. Kawngpui siamnaah lung chang tha tak phah tur ang phah a nih loh a, a inthuahthip dan tur dik tak anga kawng chhuat siam a nih loh a, a chhut muk dan tur dik tak anga tih a nih loh a, balu, rora leh bitumin a nih dan tur ang taka hman a nih vang te a lo ni thin a.
Buidling lian pui pui, kum rei lo te hnuah enga tinge thiah a ngaih leh mai thin? Enga tinge ruah a sur hian khawpui chhung kawngpui dungah bawlhhlawh a inchheh vum ther thur thin? Engatinge tlangram awitlanah tuihawkin luan ngaihna hre lova kawngpui dung a zawh dul dul thin? Tuiluankawr ni na na na, engatinge bawlhhlawha a khah hung thin? A chhan chu kan hre vek awm e.
Mihring leh lui nungchate chenna lui tui engatinge a nut avanga nungchate an thih a, mihring in tur pawh pump theih lohva a awm thin? Engatinge sik leh sa a hreawm tak a, khua a lum tual tual tak? Thil dang dangah pawh hian harsatna a lo awm thin chhan hi han belchiang ila, a khaiklhawmtu chu ‘dan zawm loh vang’ a lo ni tlangpui.
Corruption hluarna tiin kan ram hi a mi chengte ber hian kan sawi thei a, enge a chhan ber kan tih chuan, a chhan chu ‘dan zawm loh vang’ tho a ni.
Dan zawm loh chhan tam tak hi chu dan kenkawh that loh vang te a ni a. Ram changkangte an changkan chhan leh harsatna an tawh ve vak lohna chhan chu, dan kengkawhtuten dan an kengkawh tha a, danin zah a kai a, mipuiin dan an zawm tha thin a ni. Changkan leh hmasawn kan duh chuan, sum sen belh pawh a ngai lo, ‘dan zawm’ mai hi a tawk.