Hasina-i paih thlak hnuah India-a lut ru tlahniam
Hasina-i paih thlak hnuah India-a lut ru tlahniam
Bangladesh-a Sheikh Hasina-i paih thlak a nih hnuah ramri kâna India-a lut an tlahniam sawt niin Border Security Force (BSF) Director General Daljit Singh Chowdhury-a’n a sawi.
New Delhi-a BSF leh Border Guard Bangladesh (BGB) chuan a vawi 55 nan biennial director general-level-a inbiakna an kalpui mek.
Inbiaknaahhian BGB Director General Major General Mohammad Ashrafuzzaman Siddiqui-a chuan Bangladesh-a hnam leh sakhaw zuitu tlem zawk beih an nih chungchang chu sawi uar deuh a nih thu a sawi.
“Tlem zawk thenkhat atangin hlauhna avanga kan hnena rawn thlen an awm nual a; mahse, BGB chuan a theih ang angin a puih a ni. Bangladesh sorkar pawhn an himna turin hma a la zel bawk,” a ti.
Inbiaknaa an sawiho lian ber chu ramri hmun pawimawh zual barbed-wire hmanga hung chungchang a ni a, hei hi Bangladeshi palaite chuan an duh lo.
“Hung hi kawng hrang hrangah enhova tihfel ngai a la awm a; mahse, kan harsatnate hi chin fel thuai a nih a beiseiawm,” tiin BGB chief chuan a sawi a. Ram pahnih ramri vengtu sipaite hian a tul anga joint survey neih a that thu a sawi bawk.
Siddiqui-a hian kum 1975-a Indo-Bangladesh border agreement ziahah BSF-in ramri hung thar tuma hma a lak tum dan chu a tel lo niin a sawi a. “Kan inbiaknaa kan thu sawi laimu ber chu ramria himna tur a ni a, hung leh a kân ru danna tur pawh a tel,” a ti.
Tun tuma sipai lalte inbiakna hi nikum August thlaa Hasina-i sorkar paih thlak a nih hnua inbiakna hmasa ber a ni a, kha mi hnuah khan inthenawm ram hnih inkar hi a tha vak lo zui a ni.
BSF hian km 4,096-a thui India-Bangladesh ramri vengin state panga — West Bengal (2,217 km), Tripura (856 km), Meghalaya (443 km), Assam (262 km) leh Mizoram (318 km) kaltlang a veng a. BGB hian lehlamah vengin an inbiak hnuhnung ber chu Dhaka-a March, 2024 kha a ni.
Ram pahnihte hian ramri himna leh palai intirh tawn zel hi tha an ti dun a, thuneitute chuan inmil lohna awm thinte sawihova tha zawka ramri ven zel hi an duh a ni.