Hate speech case nei ram hruaitu tam hle

Member of Parliament leh MLA rual 107 lai te chuan ‘hate speech case’ neiin hetiang case nei candidate 480 vel lawih te chu tun hnai kum nga chhungin inthlan an hmachhawn tiin poll rights body Association for Democratic Reforms (ADR) te chuan an sawi.
ADR leh National Election Watch (NEW) te chuan heng MP leh MLA te affidavits te hi zirchianna an nei a, heng bakah hian Assembly leh Lok Sabha inthlana hlawhtling lo candidate te pawh an zirchiang tho bawk.
Zirchianna an neihah MP leh MLA rual te lawmaker ni mek te chuan ‘hate speech’ case kaihhnawih an nei an ti a.
Analysis an neihnaah MP 33 te chuan hate speech case an nei a, heng zingah hian Uttar Pradesh atangin pasarih, Tamil Nadu atangin pali, Bihar leh Karnataka leh Telangana atangin pathum, Assam, Gujarat, Maharashtra leh West Bengal atangin pahnih theuh leh Jharkhand, Madhya Pradesh, Kerala, Odisha leh Punjab atangin pakhat theuh an awm bawk.
Tun hnai kum nga chhungin candidate 480 lai hate speech case nei te chuan state assembly, Lok Sabha leh Rajya Sabha inthlan an chuh a ni tiin ADR te chuan an sawi a.
MP hate speech nei zinga 22 te chu Bharatiya Janata Party (BJP), pahnih chu Congress leh Aam Aadmi Party (AAP), AIMIM, AIUDF, DMK, MDMK, PMK, Shiv Sena (Uddhav Balasaheb Thackeray) leh VCK atangin pakhat theuh leh Independent MP pakhat a awm bawk.
MLA sawm sarih pali laiin hate speech case an nei bawk a. Chung zinga pakua chu Bihar leh Uttar Pradesh atangin a ni a, Andhra Pradesh, Maharashtra leh Telangana atangin paruk, Assam leh Tamil Nadu atangin panga, Delhi, Gujarat leh West Bengal atangin pali, Jharkhand leh Uttarakhand atangin pathum, Karnatak, Punjab, Rajasthan leh Tripura atangin pahnih theuh leh Madhya Pradesh leh Odisha atangin pakhat theuh an awm bawk.
Hate speech case nei MLA sawm hnih te chu BJP atangin a ni a, Congress atangin paruk, AAP atangin paruk, SP leh YSRCP tangin panga, DMK leh RJD atangin pali, AITC leh SHS atangin pathum, AIUDF atangin pahnih leh AIMIM, CPI(M), NCP, Suheldev Bharatiya Samaj Party, TDP, Tipra Motha Party leh TRS atangin pakhat leh Independent MLA atangin pahnih an awm bawk a ni.