Hausak-ah Mark-a’n Bezos a lehpel Elon Musk a la hausa ber

Hausak-ah Mark-a’n Bezos a lehpel
Elon Musk a la hausa ber
Meta CEO Mark Zuckerberg chuan Amazon founder Jeff Bezos lehpelin, khawvela hausa ber dawttu a ni ta. Bloomberg Billionaires Index-in a tarlan danin Zuckerberg hausakna hi dollar tluklehdingawn 212 a kai ta a, Bezos-a hausakna hi dollar tluklehdingawn 209 a ni ve thung. Bloomberg data-a a landan chuan Zuckerberg hausakna hi May ni 5 khan dollar maktaduai 846-in a pung a, Bezos hian dollar tluklehdingawn 2.90 a hloh ve thung. Hetiang thil a thlenna chhan chu Meta sare hlutna hi thla kalta khan 16%-in a pung a, Amazon lut hi 6.33% chauhin a pung ve thung.
Khawvel mihausa zual pathum zingah Meta CEO Zuckerberg chiah hi kumina hausakna pung a ni a, kuminah a hausakna hi dollar tluklehdingawn 4.63-in a pung tawh.
Hetihrual hian Elon Musk hausakna tlahniam nain, khawvela hausa ber a la ni ta tho a, Tesla leh SpaceX CEO Elon Musk hlutna hi dollar tluklehdingawn 331 niin Bloomberg chuan an tarlang. Musk hi US President Donald Trump hnuaia DOGE enkawltu niin, US-a sorkar sum hman sual leh eirukna chi hrang hrang a hai chhuak nasa hle a, mahse, hei hian opposition lam, Democratic Party lamin an beih nasat phah a, a company pawhin a tuar a, a hausakna pawh a tlakhniam phah nasa hle. Tunah chuan Musk hian a company lamah hun tam zawk a inpek a tum leh ta a, hei hian a hlutna pawh dollar tluklehdingawn 7.5-in a rawn tipung lehnghal a. Musk hian May thla atangin DOGE tana a hun hman chu khar khata ni hnih khat chauh a nih tawh tur thu a puang a, chumi hnu lawkah Tesla share hlutna 5%-in a pung nghal a, chu chu dollar tluklehdingawn 251 a tling nghal der!