Hazard-a’n football a chawlhsan

Footballer lar, ball thiam tia hriat reng tawh tur Eden Hazard chuan kum 16 chhung zet hun a lo hman tawha professional football a chawlhsan thu a puang ta nge nge a, kum 32 mi lek ni chungin football a mangtha.
Winger tlan chak leh ball thiam Eden Hazard hian a rawlthar laiin Royal Stade Brainois, AFC Tubize leh Lille tan a khel thin a. French club Lille hi a professional club hmasa ber niin heta tang hian hriat a hlawh chhi hluai. Ligue 1 lamah a vul hnuin English Premier League club lian Chelsea mit a la ta viau a. London club lian Chelsea hian kum 2012 khan an la lut. Chelsea tan hian a khel tha zui ta viau a, EPL-ah vawi 245 khelin goal 85 a thun. Blues hi Premier League-ah vawi hnih a champion pui a. FA Cup-ah vawi khat a champion pui bakah Europa League-ah vawi hnih a champion pui bawk. Chelsea tan hian inelna hrang hrangah vawi 352 a khel a, goal 110 a thun hman.
Chelsea tan a khelh that thei em vangin club ropui leh hausa Real Madrid chuan kum 2019 khan £89m zet sengin an la lut a, a lakah an beisei a sang hle nghe nghe. Real Madrid a zawm tirh lamah beisei-awm takin inlan bawk mah se hliamin a tibuai ta fo a, a pawimawhna a hloh hret hret. Hliamin a tihbuai ngun em vangin kum li chhungin La Liga-ah vawi 54 chiah a khel a, goal li chiah a thun nghe nghe. A hliam dam hnuah pawh beisei a phak tak loh em vangin Real Madrid nen inbe remin a contract chu a hun hmain tihtawp a ni a. Nipui bazar lai khan chhuah zalen a ni. Real Madrid in an chhuah zalen hnuin sawmtu nei ve bawk mah se inkhel zui zel lova football chawlhsan a thlang a, October 10, Thawhlehni khan football a chawlhsan thu a puang zui ta a ni.
Hazard hian football a khelh chhungin Belgium tan vawi 126 khelin, goal 33 a thun a. Club leh ram tan vawi 635 khelin goal 168 a thun a. EPL, La Liga, Champions League, Europa League, FIFA Club World Cup, FA Cup, Copa del Rey leh UEFA Supper Cup trophy a chawi a. Fifa World Cup-ah Belgium chu pathumna a nihpui tawh bakah mimal chawimawina hrang hrang a dawng tawh bawk.