‘He trophy hi ka anpuite tan ka hlan e’ – Coco Gauffn

Serena Williams (2015) hnu lama American mihang zinga French Open champion ni thei hmasaber Coco Gauff chuan Inrinni zan hmeichhe singles final-a 6-7(5), 6-2, 6-4-a world number one Aryna Sabalenka a hneh hnu khan a trophy sualchhuah chu amah ang hmel pu ve bawk leh a thlawp zawng thlawp vetute zawng zawngte tan a hlan tih a sawi.
Kum 21 mi chuan, “Kei hi ram leh hnam hmangaihna la na ve tak mi ka ni a, American nih hi ka chhuang larh a; keimah ang ve tho American-te leh ka thlawp zawng thlawp vetute aiawhtu ka ni hi ka inchhuang bawk,” tiin a sawi.
Inrinni final match-ah khan rinkai lo zawk Gauff khan indomi dik tak angin game a fight a, set hmasa ber chang zo ta lo mah se a hnuhnung pahnih chu harsa lutuk loin a la thei a, a vawikhatna atana Roland Garros title a hlawhchhuah rualin tun kha a career-a Grand Slam singles lallukhum tum hnih a khumna chiah a ni.
Coco Gauff kha kum 2002 champion Serena hnu lama United States atanga he title la leh thei naupang ber a ni nghal bawk.
French Open champion a nih rual hian a vun rawng avang leh politik thil avanga harsatna tam tak a lo hmachhawn ve tawh chungchang Coco Gauff hian tarlangin, a chunga tarlan tawh ang hian, an ram lama a anpui leh politik thila tuar vetute zawng zawng tan a trophy lak pawh a hlan hial tih a sawi.
2023 U.S. Open champion lo ni tawh Gauff chuan, “He title hlawhchhuah hi ka tan chuan a namen lo a, tun dinhmunah tak phei hi chuan kan ram lamah thil tam tak a thleng zut zut a, in hriat vek kha,” tiin a ruh lang chuan a sawilang dawt duh lo a, nui chungin an ram lama a anpui leh a rilru sukthlek ang pu ve mite tan a hlan tih a sawi.
Kan hriat angin, nikumah United States-in president an thlang a, politik kawtkaiah thil tam tak a thleng a, president atana Donald Trump thlanchhuah leh a nih hnuah pawh politik inlumlet thawm hriat tur a awm chho reng a, engngemaw lai khan mihang president hial nei mah se he ram ropui takah hian vun rawng avanga inthliarna hi tawp fithla hmak a la ni lo.
French Open champion thar hi WTA ranking-ah number two niin, Roland Garros-ah khan seeding lamah pawh No. 2 bawk a ni.
Kum ruk mi lek a nih lai atangin tennis a khel tan a, a tennis idol pahnihte chu Serena leh a laizawn Venus Williams-te an ni.
World number one junior hlui Gauff hian kum 2018 khan ITF circuit-ah a professional career a tan a; kum 15 leh thla thum mi ni chungin professional era-a main draw thleng thei player naupang ber niin, chu mi tum chuan first round-ah vawi nga champion tawh Venus Williams a barakhaih a; fourth round-ah champion zui ta Simona Halep a ngam ta lo a ni.
Kum 2018 vek khan Caty McNally nen inkawp chungin doubles title pahnih a la a; kum 2019 khan Linz khawpuiah a vawikhatna atan WTA singles title a sualchhuak.lamah la lehin, 2022 French Open final-ah Iga Swiatek a hneh lo a, runners-up niin, kha tournament-ah vek khan Jessica Pegula nen tangdunin women’s doubles final an khel bawk.
Gauff hian kum 2023 khan U.S. Open inbuatsaihna tournament lian pahnih Cincinnati Open leh Washington D.C. title la ve vein, a chetthat a kal tluang bawk a, final-ah Sabalenka hneh lehin kum 2017 champion Sloane Stephens hnu lama American hmeichhiate zinga U.S. Open title la leh thei hmasaber a ni zui ta nghe nghe.
Kum 2024 chhung khan Katerina Siniakova nen tangdun chungin French Open-ah a Grand Slam doubles title hmasaber a hlawhchhuak a; Paris Olympics opening ceremony-ah female flag bearer niin, U.S. flag bearer naupang ber a nih piahlamah American tennis player zinga Olympic-a American flag kengtu ni thei khawpa chawimawina sang hlawhchhuak thei hmasaber a ni.
Nikum khan season-ending WTA Finals title a hlawhchhuak ngat bawk.
Kum 2025 June thla a herchhuak a, world top two player inbeihnaah Belarusian nu hleitling leh rothap Sabalenka meuh hnehin French Open title a hlawhchhuak zui leh ta hial a ni.