Health department-a thawktuten emergency-a chet lak dan tur zir

Health department-a thawktuten emergency-a chet lak dan tur zir
Mizoram Health Systems Strengthening Project (MHSSP) buatsaih December 1-5 chhung awh tur “Khuarel chhiatna leh natna punlun thut hmachhawn dan tur” training chu Thawhtanni khan tan a ni a. District tin Chief Medical Officer office aiawh, Civil Hospital Aizawl leh Lunglei aiawh leh District Hospital tin aiawh, an vaiin mi 40 an tel.
Training hawngtu MHSSP project director Dr Lily Chhakchhuak chuan khawvelin Covid 19 a hmachhawn atanga hmuh theihah chuan hmun tinah chhiatrupna hmawchhawn dan training duh anga tha a awm loh avangin kan tuar na a, mitthi pawh tam tak an awm tih a sawi.
“Tunlai kan hun tawnah natna emaw khuarel chhiatna eng pawh thleng reng thei dinhmuna kan din avangin, hemi kawngah hian Mizorama hriselna lama thawktute training tha zawk kan neih a tul a. Public health emergency management hi doctor thiam ber pawhin amaha a tih theih loh, hospital tha ber pawhin anmahnia an tih theih loh thil, district leh state level thlengin thawhho a ngai a, Health department-a thawk a tam thei ang an inzir a pawimawh,” a ti.
District tin-ah a remchan dan anga training hi facility zawng zawng tana buatsaih leh tum a nih avangin tun tuma telten midang zirtir chhawng thei tur khawpa an thiam a pawimawh tih a sawi bawk.
Training petu turte hi Kolkata-ah July 14-19 khan an lo zuk inzir chhuak tawh a. India ram puma disaster management training neih thin ang hmanga training pek tum an ni.
Chhiatna thleng thei damdawi in, district leh state pum anga kan hmachhawn theih dan zirtir a ni dawn a, exercise hrang hrang neihpui bakah Disaster Management & Rehabilitation department nen mock drill neih tum a ni.