Health minister-in khawl thar hawng Kuminah Nursing School luah a duh

District Hospital Siaha-ah CT Scan khawl thar leh RtPCR laboratory thar chu Health & Family Welfare minister Lalrinpuii’n Nilaini khan a hawng. Siaha-a Nursing School sak zawh thawkhat tawh, luah luh theih loha la awm reng chu kumina luah theiha peihfel turin contractor a chah.
District Hospital Siaha-in nasa taka hma a sawn theihna atan department hrang hrang thawhhonaah lawmthu a sawi a. Hospital-a thawkte thawhrimna leh inpekna chhuanawm a tih thu a sawi. Hospital-in service a pek theihte a tam thei ang bera mipuiin an hriat theihnan uar lehzuala inhrilhhriat a pawimawh, tiin, khawl tha tak tak an neih chu tangkai taka hman a nih theihnan mipuiin an hriat a tul tih a sawi a ni.
“Covid-19 hrileng atangin natna hri hmuhchhuahna chak leh rinawm, inbuatsaihna tha a pawimawh zia a lang chiang a. RT-PCR laboratory hawn tak hi hrileng dang pawh lo awm se, inbuatsaihna tha lo neih lawk theihna tura din a ni,” a ti.
Health minister hian Nilaini zing khan Siaha-a Nursing School sak mek a tlawh a. Peihfel thawkhat tawh, luahluh theih loha a la awm chu pawi a tih thu sawiin, luah thuai a nih theihnan hma lak ngai leh thuamthat ngai lai enpui a, kumina luah luh theiha zo turin satu contractor a chah.
Maraland Gospel Centenary Hospital a tlawh bawk a, thawktute nen an inkawm a ni.
Thawhlehni khan Siaha district bawrhsap VL Hruaizela Khiangte hoin minister Lalrinpuii hi sawrkar hotute, tlawmngai pawl aiawhten nen an inkawm a. Siaha-a health lama thawktute hnathawh chu chhuanawm a tih thu minister hian sawiin, malaria leh scrub typhus laka beihpui an thlakna kawngah an chhuanawm takzet tiin, tlawmngai pawl hrang hrang bakah kohhranin sawrkar hmalakna an tawiawm tha tih a sawi a ni.