Healthcare scheme leh sawrkar hnathawkte

Kumin April atanga hman tan tur Mizoram Universal Healthcare Scheme chu nimin khan chief minister Lalduhoma’n a tlangzarh a; he scheme hi ‘him leh huapzo’ tiin a sawi.
A him dan chu – sawrkar hi sum leh paiah lo tlachhe palh thut a nih pawhin bank-in a peksak ang; bill hi ni 30 chhunga sawrkarin a pek hman loh chuan a pung a pe tel thin dawn a ni.
Cashless a ni dawn a, damloten senso tur pawisa an dap kual buai a ngai dawn lo. Inziahluhna fee hi kum khat chhung atan a ni a, Ward awm duhna (general/semi private/private) azirin inziahluhna fee chi thum (2,500/5,000/10,000) a awm a, hei hian inenkawlna senso cheng nuai 5 a keng.
He scheme hi ‘huapzo’ tih takah, tunhmaa tel ngai lo ‘sawrkar hnathawkte’ pawh a huam vek a. Sawrkar hnathawkte hi chu thla tin an hlawh atanga ‘cut’ mai tur a ni a. An hlawh level atangin an pek tur zat hi bituk a ni a. Pay Level 13 & above chuan thla tin Rs 1500 an pe ang a; Level 10-12 tan Rs 1000; Level 6-9 tan Rs 700; Level 3-5 tan Rs 400; Level 1-2 tan Rs 300 leh, Provisional Employees/ Muster Roll te tan Rs 200 te a ni.
Thla tina an pek tur zat hi an hlawh atanga 1% vel a ni a, hei hi sawrkar hnathawk, income tax pe ve lo tan chuan a nâ hran awm lo ve.
Mizoram sawrkar hnathawkte hi an vannei hle a, income tax an pe lo chung pawhin medical reimbursement an ti thei thin a, thildang hamthatna hrang hrang an la nei nual bawk. Tunah chuan damdawia an inekawlna senso atan an hlawh atanga 1% an thawh ve tawh dawn tihna a ni a, ram tana contribution hlu tak tur a ni a, hetiang scheme duan a ni hi a remhriatthlak hle tiin a sawi theih awm e.
Kan hriat angin, India ramah hian Income Tax Act hnuaiah state dang chuan income tax an pe a, keini northeast state-a scheduled tribes te hi chu income tax exemption kan ni a, chungte chu – Mizoram, Tripura, Manipur, Nagaland, Arunachal Pradesh leh Assam chhunga district thenkhat. Hei bakah hian J&K hnuaia Ladakh pawh income tax exemption-ah hian an tel.
Income Tax Act hnuaiah chuan kum khata nuai 3-5 chin lalut tan 5% pek a ngai a, chutiang zelin nuai 5-10 lalut chin chuan 20% an pek a ngai a, nuai 10 leh a chunglam lalut chin tan income tax 30% te pek a ngai thin.
Mizoram sawrkar hnathawkte hian income tax hi pe ve dawn ta se, tuna healthcare scheme hnuaia an thawh ve tur 1% let 5 te, a let 20 te leh a let 30 te an pek a ngai dawn tihna a ni awm e.