JC.Zoremi Hmar Joute
-- Advertisement --
Pathianin mihringtea a dah, hlu leh ropui tak, hringnun kalchawi kawng tin hriltu leh a la lungrun deuh tena mahni nunna hial pawh an lâk duh phahna, mi vanneite khawvel nuam chentirtu chu hmangaihna hi a ni.
Mipa: Mipa thenkhat chuan nula laka tlâktlum dan an thiam em em mai a, Pathianin chungnung zawk leh chak zawk ni tura a siam an nih hre rànin hmeichhiate hi an thu hnuaia dah an tum ngar ngar thin. Nula ngâi thei tak tlangvalte hi an pahnih pathumna tur hmeichhia chuan lo duh tawh loh mai awm hi a ni tak na a, a ni chuang lo; an thiamna hian a hneh leh tho thin.
Chutiang tlangval chuan nula a han kherh tak tak chuan fing takin nula bulah chuan a mawl a, a duhâmna leh mahni hma a sialna chuan thil phal taka awmin a inphal a,a nghahhlelhna nasat tluk zetin a sa seh tur hmaah chuan a dawh thei a, a thu thua a dah theih hun thlir ru rán chungin a inphah hniam a, chapo takin a inngaitlawm thin. Nula kiangah chuan huai takin a ti a, phur takin a awm hle hle a, a hmuhsit rûk tak chu a fak a, a verveknain a ngil thin; hei hi tlangval thenkhat, hmeichhe mutpui hnem chu ropuina emaw ti tlat zia a ni.
Mipa dik tak, thinlung tuihna tui tak nei an awm bawk a, Pathian tih chunga nung, invawng thianghlim tlat leh hun remchang a awm pawha Josepha anga tlanchhe thin a ni. Hmangaihnaah a chiang a, a hmangaiha chu a par mawina thliahsak hnu pawh lo ni se a zuam mai lo va, a kawppui tlin lohna te chu a hmangaihna chhum zam chuan a hliah khuh tlat tawh avangin ten turin a chak tawk lo va, iai turin a derthawng tawh hek lo. Hmangaihna lipuiah chuan chêngin a chhek per chiaih chiaih a, a lo vawt ta deuh a nih pawhin vau kamah a inthuam lumna tur thawmhnawin a lo nghak reng tih a hria a, li thuk laia a hleuh pawhin a zâm chuang lo. Nula lêm nan hmaikawr a vuah ve lo va, hmeichhiate zahawmna a zahsakin a humhim thin. Hei hi mipa dik tak chu a ni.
Hmeichhia: Pathianin a siam dana chak lo zawk leh derdep zawk a nih hre reng mah se mipa thunun thei nih châkna leh tumna chuan a bei ve fo a, a fing ziktluak lo tih a hriat chhuah meuh chuan a lo tlâi tawh thin. Tlangval dawt thu sawi chu a awih a, a chapona chuan chu tlangval chu a zuamtir a, mahni hma a sialna leh a duhamna chuan chu pa chu a pual bik ni thei turin a ngaihtir a, mipa finna chu a ngainep a, hun rei lo te atana a thil tum chu kumtluang daih tur niin a ring a, a zah theih lohna chu a khawngaih phah a, a sawi zawng zawng chu a pawm a, a chet dan zawng zawng chu mawi a ti a, a ât derna leh a inphah hniamnaah chuan a khawngaih a, heng te avang hian mipa chhu khûm ta ngeiin a inhria a, a lawm a, a tilawmtu chu a làwm a, tihlawm lêt ve chu tul tiin a bat angah a ngai tlat a, chu veleh mipa thu hnuaiah chuan a intulut nghet ta chiah thin a ni.
Hmeichhe tluang tak, Bible-ina ‘hmeichhe khawsak tha’ a tih ang mai an awm bawk a. Dâwt leh thutak a bel chiang hmasa a, mipa kam thlum lakah a fimkhur a, tisa taka thinlung bun ruak thin leh, hmangaihna dik neitu a thliar thiam a, mi tha lo a ni tih a thinlungin a hriattir tawh chu zah der tak chung siin a tlan chhiatsan thin. A hlutna chu a vawng thianghlim tlat a, a thianghlimna man tozia chu chhût chhuak thiam kher mah suh se Lalpa a tihna chuan zahawmah a siam a ni. A thinlung duhawm hlutna chu Lunghlu sen mi nena tehkhin fo a ni a, a sakruang mawina pawh vana Arsi ang maia thlir ninawm lo leh mawi a ni fo ang. A sêih hmêl chu mi tin tan hmuhnawm a tling a, a nui ri pawh rimawi tum thiamte beng fahtu. Hei hi hmeichhia a ni.
Hmeichhia leh mipa nupaa kan insiam hian chhungkua kan din a ni a, chhungkaw hlim tak din turin hmeichhia kan pawimawh zawk tih hi chu tuma’n kan pha thei lo vang. Mo dinhmun hre chiangtu ka ni a, mo-ah pawh fing deuh leh â deuh kan awm tih pawh ka chiang khawp mai. Tumahin mo sual leh chhungkaw pêt darhtu nih kan duh lo va, mahse chhungkaw tikeh darhtu erawh an awm ngei lawi si. Tumahin mo-te tiduhdahtu leh hmusittu, hrawn hrehawm nih kan duh lo va, mahse mo-te tihrehawm em em, vawi tam an mittui titlatu an awm ve bawk; a pawimawh berah chuan that leh that inlawm tawn thiam hi a ni.
Chhungkuaah buaina leh harsatna kan neihin pawn lam miin min rawn chin felsak thei lo va, eng ang pawn sep rawtuiin puangzar mah ila mahni mawng hlim nih leh nuihza siam nana hman bak hlawh chhuah kan nei lo tih hi hmeichhe fing chuan an hriat vek ka ring. A tu ve ve-ah pawh thatnaa hneh theih hlawl loh mihring chu an awm ve ngei ang a, mahse an tam lo vang. Misual na na na, dawt sawia fak kual chiam tur ka tihna lam a ni lo va, kan thatna lai chauh inhmuhsak tawn hram hram ila, movin a pasal chhungte rêl lo se, pasal chhung ten mo rêl lo se, tlâwmna nun hi ni tin zirlai thar atan hmang theuh ang u; khuanu sam suih phelh darh turin tu mah kan ropui tawk lo ve!