HEALTHCARE SCHEME PHÊNAH FEDERATION PAHNIH

R. Lalfakawma Seling

-- Advertisement --

Kalphung thar sawrkhâr kan han hmuh meuh chuan thil thar, mipuite tana lawmawm leh lawmawm loh lam pawh kan hmu chho zel a. An âu hla angin ‘Mipui sawrkhâr’ tih takah kum danga kan hmuh ngai loh Mizoram Poor Federation-te hial kan han hmu ta chu a ni a; Delhi tlânga Kejriwal-a leh a hote pawh kan hre chhuak rum rum mai alawm. Tûnlai tak hian anni hian thlirna zau tak neiin an Federation-pui, Federation of Mizoram Government Employees & Welfare(FMGEW) chu Healthcare lamah an rawn phût hle mai a. Mi rethei inzawmkhawm pawl tan chuan hetianga sawrkhâr hnathawk, Mizoram budget atanga 82% vel zet mai hlawh leh an inrelbawlna atan huitute an beisei hi thil awm lo pawh a ni bik lo ang.
Hman deuh khan MLA inthlan dawnin All Mizoram Farmers Union – ‘Kuthnathawktu Pawl’ kha a rawn vung ve hluai mai a. Amaherawhchu an ke chheh a phêt deuh nge ni, arbâwm hal an sawi ang deuhin rei an vung lo; inthlan zawh kha chuan an pil bo hlen leh ta mai a nih kha. Chanmari kawn atanga Vanapa Hall kawt thleng ‘Kuthnathawktute chhan chhuahna’ kawng an zawh a. Khatih laia an President khan kuthnathawktute chu an beidawng tawpkhawk tawh a ti a. Sawrkhar hruaituten an VIP anga sawi sia an ngaihsak lohzia te; sawrkhâr chu kuthnathawktu, thlai thar tam apiangte beidawnna thlentu a nih avâng leh enkawltu tha, ngaipawimawh tak taktu an neih loh avângin an beidawng thiltih a ni tihte pawh an sawi. Sawrkhâr chuan an duh ang anga khalh kawiin politics hmanrua atan chauh an duh niin an sawi a, sawrkhâr an au eih zo lo a nih chuan na zawka hmalak an tum thute kha an sawi a nih kha.
Tuna kan ram dinhmun enin Mizoram Poor Federation-ah hian membership fee pe tur kan tamin ka ring a; kalphung a dik phawt chuan Mizorama Federation lian ber, thiltithei ber tur pawh a ni thuai ang. Mi rethei leh harsa zawk tan chuan pawisa pek ngai lova Healthcare Scheme kalpui tluka hlu a awm lo va; a hlawhtlin theih nan kawng zawh pawh huama theihtawp an chhuah pawh thiltih awm tak a ni.
Kan sawi tak Federation pahnihte hi an intia lo hle a, rethei pawl leh hausa pawl pawh kan ti thei hial awm asin. Federation ve ve e ti lo chuan a sawrkhâr hnathawkte lam hi a chhawrtu sawrkhâr lakah an lungawi lo chho tan mek a; a rethei lam zawk, sawrkhâr hne hnai lo zawkte erawh sawrkhâr hmalakna leh kalphungah an lawm viau thungin a lang a. A rethei pawl lam ten MUHCS chu a hlawhtlin ngei theih nan theihtawp chhuaha sawrkhâr hma an lakpui laiin a hausa lam lah chuan hransan tumin an duh lo mek chu a ni si.
Sawrkhâr hian a mi chhawrte hi zawmtir thei chu nise Healthcare sum dinhmun a tha sawt dawn tih a chiang reng mai a. Mahse, vawiin thleng pawhin an la innawr fuh hlei thei lo va; a federation lam hian court lamah an dikna chanvo humhim tumin hma an la dawn a ni awm tak deuh deuh a, engtin kan kal zel dawn chu ni maw. Sawrkhâr hnathawkte hian dammawh hritlan changa system fel tak kalpui mek an neih chu lungawithlak tawk an ti a, a bâk an beisei lo a ni awm e. Tin, kalphung thar ni lo kalphung nghet tak, tha an tih tak an kalpui meka chu inzir chawpin an thlak mai mai ang tihte an hlau a ni. Chutih mek laiin Healthcare Scheme tha mi zir chiang turin kan Health Minister leh a hote lah Thailand lamah April ni 28 khan an la inzir tan mek chu a ni a; inzir reng a pawimawh rualin zir chawpa kal tum kan nih hi federation-te hlauhthawn tak a ni mêk si.
Kan mamawh leh thil tulte hi chu ram dang ten engtin nge an tih tihte hi hre viau tawh awm kan ni a. Kan thiam a, kan fing a, kan zir a, khawvêl ram dang kan dai dar tawh tehlul nen hian a pawimawh lai hi kan lo hre fuh lo leh thin. Ram kaihhruaina leh kawng hrang hranga hmalakna turah pawh hruaitu hmasate tih dan, a tha lai leh tha lo lai en a, lo inzir thiam vek tawhte chu kawng dika kal deuh pur pur awm hi a nia. Hetiang kawngah chuan kan adviser to Chief Minister pakhat hi a fakawm pawl tak niin a lang. Hmanni lawkah naupangtêin lawng sipai atangin a pension a, rei lo tê a inzir chhung pawhin a tana thil tul tur leh a tanfung tinghettu atana thil pawimawh rêng a hre zar zar mai. Dik tak chuan mi tam takin ‘tawng thei sa bawp chang’ an tih chhan pawh a subject-ah a chiang a, a thiam êm avânga an hnial thlak theih si loh vâng a ni thin.
Dik tak chuan sawrkhâr hnathawkte an hâi leh si chuan sawrkhâr tan chânna nasa tak a ni dawn a, Healthcare tha mi kalpui kan tum hi a zûzi mai ang tih thlengin a hlauhawm. A zûzi a nih chuan sawrkhâr hnathawk pawh ve ni lo, golden card lo titawp tawh laklawh si tan chuan ‘a tawp e lumam’ tia hawi lawl lawl a ni tawh mai ang chu. Tunah hian mipui lamah Healthcare tha mi – Mizoram Universal Healthcare Scheme hi a tla na lutuk lovin a lang bawk a. Hei hi a chhan lian ber pakhat pawh private damdawi in lam ten an zawm loh vang a ni. Mi harsa zawk tê tê pawhin sawrkhâr sikul aia fee chawi ngaihna sumdâwng sikul kan pan zawk ang tho hian kan damloh chang pawhin pûk chawp leh chhungkhat hnaite thawng kualin private damdawi in kan pan hram hram hlawm a. Damlo enna hmanrua leh thawktu indaih/biangbiak kawngah sawrkhâr damdawi in ten private damdawi in an phâk loh vâng te pawh a ni ang. Sawrkhâr damdawi inte hi tangkaiin chhawr viau mah ila, mi tam tak tan chhawr theih loh tur thila inziah luh kha a tul lo ve bawk a ni.
Kan sawi tak golden card tihtawp kher tul lai pawh hi mi tam takin Healthcare tha mi kan hnar chhan lian tak pakhat a ni ang. Golden card-ah chuan a tira mi kha kan ring char char mai a; tuna kan kalpui turah hi chuan kum tin tih thar a lo ngai bawk si. Chuvangin mi rethei zawk tan chuan kum tin tihthar ngai ve lo chu thlan zawk awm tak a ni ve bawk.
Hmalakna tur kawngah hian pawisa hi a lo pawimawh khawp mai a; MUHCS tha lutuk tur pawh hi pawisa lamin a daih loh chuan a tihngaihna a awm lo ang. Sawhthing kan lei anga a hlawk lo zawnga healthcare lama intlak ral vak chu sawrkhâr tan pawh a harsa tawh ang a; engtia tih emaw chu a tûl si. Mi harsa zawk tan pawisa pek chawp/lawk ngai lova tih theih zung zung tluka thlakhlelhawm a awm lo; mahse, a sawrkhâr hnathawk pawh ni lo, mi thiam pawh ni lo, thingtlâng mi harsa leh mâwl zawkte hnenah pawh kan scheme thar hian hralh a tla lo riau mai a. Beisei kan phak lo mai ang a, a changtu minister fel tak pawh hian a hmingchhiatpui thei mai ang tih te pawh a hlauhawm ru deuh e.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More