Helicopter service tih belh tum

Adviser to chief minister (Technical) Er H Ginzalala chuan September 3-6 chhung khan Delhi-ah sawrkar laipui hotute a dawr.
Chief minister-in helicopter service changtlung leh tam zawk Mizoram-in a neih theih nana hma a lo lak tawhna chu bawhzuiin, Ministry of Home Affairs leh Civil Aviation hotute a kawm a. Ministry of Home Affairs hotute hian helicopter service awmsa bakah a dang pakhat pek belh an tum thu an lo hrilh. Mizoram sawrkarin lehkha tihfel ngai tlem a tihfel hunah tender theih a ni dawn tih an sawi a ni.
Road Transport & Highways minister Nitin Gadkari hnenah Champhai Khankawn atanga Champhai Kanan kawngpui leh Mizorama NHIDCL hmalakna a sawipui a. Minister hian kawngpui tha zawk neih theih nan theihtawp an chhuah zel tur thu a lo hrilh.
Adviser to CM hian Ministry of Ports, Shipping and Waterways Minister Sarbananda Sonowal leh Inland Waterways Authority of India chairman Vijay Kumar kawmin, Mizorama lui inkalpawhna tura hmachhawp a neih a sawipui a. Ministry lamin uluk taka ngaihtuah an tum thu an lo hrilh a ni. Ministry hotute hnena a thu thlen hi ruahman chhin (concept) chauh a ni a, leilung a nghawng dan (environmental impact), technical feasibility leh economic viability la zirchian a, chief minister hoa la thlirho a tul tur thu a sawi a ni.
Lunglei, Champhai leh Saitual District-a Krishi Vigyan Kendra (KVK) din tura hma lak mek pawh Er H Ginzalala hian a bawhzui a. Department of Agricultural Research & Education (DARE)secretary, Indian Council of Agriculture Research (ICAR) director general Dr Himanshu Pathak ni bawk chu kawmin, district pathuma KVK din thuai a nih theih nan hma an lak tur thu an lo hrilh a ni.