|henawm ram te thutlukna India tan buaina

Regional Comprehensive Economic Partnership (RCEP) agreement atanga India a inhnuhdawh atanga kum li hnuah a thenawm Sri Lanka leh Bangladesh te chuan 15-nation trading bloc a tel tum dan an zawn tur thu an sawi.
RCEP zawm tur hian Sri Lanka chuan dilna a thlen tawh tiin President Rail Wickremesinghe chuan a sawi a, Pathianni khan Belt and Road Initiative (BRI) Forum a tel turin Beijing a lut nghe nghe a.
Hetih lai hian Bangladesh sorkar chuan Commerce Minister tir thungin anni pawhin RCEP chu zawm an duh a, nakum January thla hnuah inbiakna neih tan ni se an ti.
Sri Lankan Presidential Secretariat chuan RCEP member nih an dilna chungchang sawiin ‘he trade block-ah hian major economies China, Japan leh South Korea te theihna sang tak nei an tel a ni’ tiin an sawi a.
Wickremesinghe chuan International Monetary Fund (IMF) leh an loan lakna ram dangte nena inbiakna an neih mek laiin RCEP member nih tumin hma a la zui a. Member a nih tumnaah Malaysia, Indonesia, Japan leh Thailand tena an thlawp a beisei thu a sawi bawk.
“RCEP zawm duha sawihona leh hmalakna pawh kan nei tawh a, mahse, dilna em chu kan la thlen lo. Inthlanpui kan nei dawna chumi hma chuan pawl lian emaw inremna siam emaw ti lo ila kan ti a ni,” tiin Foreign Minister A.K. Abdul Momen chuan a sawi bawk a. Chuvang chuan Bangladesh chuan RCEP membership emaw leh Brazil-Russia-India-China-South Africa (BRICS) te zawm tura hmalakna emaw an la kalpui loh phah tiin a sawi bawk.
Tun dinhmunah RCEP member te chuan global GDP 30% an hauh a, a nihna takah chuan Asian economies inzawmkhawm lian hmasa ber a ni a. RCEP document chuan ram 15 te chuan he bloc a bungrua insumdawntawnna hman te chu kum 20 chhungin 90% tariff nuai bo an tum a ti.
Hetih lai hian MEA officials te chuan RCEP atanga India in inhnuhdawhna chu a ngaihtuah tha dawn em tih chu an chhang duh lo va. Mahse, sorkar senior official chuan a thenawm Sri Lanka leh Bangladesh tena RCEP an zawm a nih chuan ngaihtuah ngai tiin a sawi thung a, a chhan ber pawh India huamchhung hnai taka awm an nih avangin Chinese trade-in a thunun theih a nihna a awm vang a ni a, China chu India aiin khawvel huapin competitive zawka ngaih a ni bawk.
India chu RCEP dintu zinga tel a ni chungin Prime Minister Narendraa Modi chuan kum 2019 khan Chinese goods in market te a luah hneh hlauhna avangin leh an tum ber agriculture leh sumdawng tenaute puih theihna tur tibuai dawna hriat avangin a inhnuh dawh tur thu a lo sawi tawh a. India chu RCEP meeting a tel tura sawm zui zel tho a ni chungin a tel zui ngai tawh lo a ni.
Sri Lanka leh Bangladesh te chuan protectionist policy chu kalsan an duh tia sawi a ni thung a.
“Sri Lanka-in buaina a tawhah regional market te chu a pawimawh ber an ni a. Sri Lanka hian thil tam tak hloh a nei a, RCEP a zawm leh FTAs dangte a zawm chuan a market a tizau thei dawn a, international player dang te nen competitive zawkin an awm thei ang,” tiin Kasturi Chellaraja Wilson, CEO of Sri Lanka’s Hemas Group chuan a sawi.