Heritage Centre sak mek tlawh

Kawlri Tlanga Heritage Site chu Nilaini khan Serchhip district bawrhsap Paul L Khuma’n a tlawh a, hnathawh kal mek a endik. PWD hotute, Heritage Society aiawhte leh contractor-te nen enho a ni.
He project hi North Eastern Council fund atanga thawh niin, Kawlri tlang hi Mizo lal Bengkhuaia kut ata Saphoin Mary Winchester (Zoluti) an laklet lehna hmun a ni a, hriatrengna lung pawh phun a lo ni tawh. He hmun hi Mizo history-a thil chhinchhiah tlak a nih avangin NEC hnuaiah project siamin Heritage Centre sak a ni a. Hna hi kumin May 1 atang khan tan niin, a hmunhma an lai mek a, heritage centre sakna tur bungraw mamawh lakkhawm mek a ni bawk.
Heritage site hi state pawn atangin leh Mizoram chhung hmundang atanga khualzin hip nan thil tangkai tak tur a ni a. Serchhip khawpui leh a chhehvela chengte tan pawh lenkhawthawna hmun remchang tur a ni. A hmunhma hi a theih chin chinah environment humhalh zawnga hma lak a nih avangin a ngaw a la chhah tha a. Mizo history vawnhimna a nih bakah Serchhip district tan tourism hmasawnna kawnga thil tangkai a nih theih beisei a ni.