Heroin a hluar, man hnem leh tawh

Kum a thar a, Mizoramah heroin a la hluar zel. Aizawlah phei chuan khawlaiah zalen takin a lei theih a ni ber a, man pawh an man hnem leh tawh.
2015-ah khan Mizoram Excise & Narcotics department-in kg 4.088 an man a, hei hi kum khat chhunga kg 4 an man tlin vawi khatna a ni. Kuminah January thlaah kg 5.973 an man!
2016 thleng khan kumin thla khat chhunga an man ang zat hi kum tluan pawhin an man tling ngai lo!
2023-ah khan kg 76.058 an man a, 2023 hi heroin an man tam ber kum a ni. Kum liam taah khan kg 46.680 an man.
Heroin hluarzia hi Aizawlah chuan khawlaiah pawh a hmuh theih a, hmun lun laiah an zuarin an lei mai mai ti hiala sawi theih a ni. A zawrh leh a hralh bakah khawlaia inchiu mawlh mawlh pawh hmuh tur a awm a, Treasury Square leh Vanapa Hall velah phei chuan hmuh nuam lo tak tak hmuh tur a tam.
Heroin hi khawlaia a man hi a che reng a, a ti thinte chuan nikum lam aiin kuminah a man hi a to hret tih an sawi.