CL.Hranga, New Siaha
-- Advertisement --
Mahni awmna hmasa Party chhuahsana Party danga insawn avanga, awmna hmasa hruaitute theitawpa dem kual chingho hi mi hlauhawm tak an ni. Hetiang mihringho hi, an insawn kual an insawn kual duh viau leh nghal a. An awmna hmasa Party leh hruaitute an sawichhe zui ziah leh nghal a. Hei hi thil chin tha lo tak a ni.
Political party hrang hranga awm member-te hi, kan duhthlanna ngeia Party-a awm kan ni deuh vekin a rinawm a.
Kan awm chhan ber chu a hrang theuh thei bawk. Mi thenkhat chu Party policy tha tih vangte a ni thei a, then khatte erawh chu chhungte emaw, thiante emaw min sawm vanga awm te, a then chu tumah sawm leh thlem vang pawh ni hran lovin, keimahni ngeiin kan hma lam hun tur thlir ran chungin, kan chhungkaw tan, fate sawrkar hna an hmuhna tur a ni mial mahna tih vang emaw, therhlo ilo vel tal ka dawng ve mahna tih beisei vang emaw, contract hna chhe te tal ka hmu ve mahna tih beisei vang emaw a a tha ber tur nia kan hriatnaah kan duh thlanna ngei a decision fel tak siam a, Party-ah hian awm (enroll) kan ni tlangpui awm e.
A enga pawh chu ni se, kan awm chhan chu, tu vang pawhin ni se, engvang pawhin ni se, kan duh thlanna ngei awm kan ni tih erawh chu a chiang a ni. A chhan chu tuman min tihluih theih loh vang a ni.
Chutih lai karah chuan mi tam tak chu hreawm tuar peih lovin, opposition a kan awm veleh Party danga chhuah mai kan ching thin. Mi then khat phei chu, mahni nupui/pasal te thih hlima ruang thutpuitu nula/tlangval lo melh tai nghal ringawt ang maiin, opposition an nih veleh chhuahna tur rulling Party an melh tai nghal ringawt thin.
A chhan chu kan retheih hlawm em vangin opposition-a awm hi kan ngam ngang lo ni berin a lang.
Chuti lai karah chuan mi thenkhatte erawh chu, “Tunhma atangin, tuin nge maw kan chhungkua hi min lo chawmsak ngai le? Kan thawhrim rahin asin maw nupui fanaute, hei leh chen hi ka lo chawm le,” tia Opposition party-ah pawh, PA tak leh rinawm taka awm lui ngar ngar mi tam tak an awm bawk thin.
Mi then khat ve thung chu chutiang rilru chu an pu ve lem lo. Party chhuahsana Pawl sawn hi an ching em em mai a. “Party te chu kawr ang a lawm,” tia Party danga insawn zung zung ching kan awm ve thung. An awmna hlui Party-ten ui eng ang mahse anmahni duhthlanna a ni miau va. Tumah kan inuibet zo lo chu a nih hi.
Hetih lai karah hian mi tam tak chu, an awmna hlui Party an chhuahsan chhanah, “Ka tan leh chhungkaw tana tha zawk tura ka ngaih avangin ka chhuak a ni,” ti mai lovin puhmawh tur hrang hrang kan dapin kan puhmawh bawk thin.
An chhuah chhan a an puhmawh leh an chhuan lam ber chu, “Kan leader in a thu a duh em vang a ni emaw, a duhàm vang emaw, mahni hma a sial vang emaw, a chuti khati vang tia mahni inthiamchawpna tlangchhipa din tumin, midangte leh thawhpui hmasate an dem kual vak vak thin.
‘Party atanga party danga insawn avanga mahni thawhpui hmasate dem kual vak vak chin hi thil tha lo tak a ni,’ An va awmna Party an chhuahsan hunah pawh, hetiang tho hian an sawi chhe leh dawn a ni tih a chiang a, chuvangin an lungawi loh chhan chhuan lam an siam hi lo hriatthiampui a, thu tak khuk a lo khukpui loh a tha khawp mai.
Hengtiang an chin avang hian tul lovah midangte rilru an tinain, thian hluite min thentir phah thin.
A nihna takah chuan, “Party chu kawr ang a ni,” an lo tih ang deuhvin, an duh loh chuan an chhuahsan mai tur a ni a. An chhuah tak avanga an awm hmasakna Party theihtawpa sawi chhiatzui chingho hi mi tha lo ber berte an ni tih hi mipui pawhin kan hriat a pawimawh tak zet a ni. Mi pangngai chinin hetiang hian an sawi ve ngai lo. Gentleman takin an awmna party an duh loh chuan an chhuahsan a, an duhna tak party-ah an lut hmiah mai a ni.
Chuvangin, hetianga mahni awm party sawichhiat ching emaw, hotute emaw, thawhpuite emaw sawichhiat zui chingho reng reng chu, an va luhna Party an chhuahsan leh huna an sawi leh dan tur tho a nih avangin a dawnsawn dan chin lo thiam hle tur a ni.
Hetiang chingho reng reng chu mi tak, sa tak, an ni ngai lo tih pawh hriat reng tur a ni.