High Court-in politics thila hamthatna lak tumah ZPM puh – Lalchhandama Ralte

Kolkata-a Mizoram House hlui hralh leh a hnulam thilah High Court chuan ZPM sawrkar chu politics thila hamthatna lak tumah puhin an thu a hnawl tih MNF vice president Lalchhandama Ralte chuan a sawi.
Thawhtannia MNF office, Mizo Hnam Runa inkhawmah Lalchhandama Ralte, MLA chuan Kolkata Ballygunge hmuna Mizoram House hlui hralha Mizo mipuiin tangkai zawka an chhawr theih tur, House lian leh dawnghlawk zawk MNF sawrkarin sa tura ruahmanna a lo siam chu ZPM sawrkarin thil awmdan kimchang hre ve lo te fuihpawrhnana hman tumin, ram hralhna lehkha siam tawh leh a man pawh dawn fel vek tawh chu mumal lo taka cancel-na thupek a ti chhuak a. Thupek hi Calcutta High Court chuan a hnawlsak tih a sawi.
“ZPM sawrkarin cancel a nih chhan a sawi – mipui nawlpui tana tha zawk tur, tih chu Court hian hnawlsakin, politics thila hamthatna lak tumna lam hawi zawk a ni, a ti. Ballygunj-a Mizoram House awm thin kha a hlui tawh avangin MNF sawrkar khan sak that dan tur a ruahman a, a hmun ngaia sa tha tur hian building regulations hmanlaiin G+3 (Mizo chhiara chhawng 3) baka sak a phal lo a. Kolkata hi Mizo mipui kawtchhuah pawimawh tak a nih tawh avang leh pantu kan pun zel avangin chhawng thum ringawt chuan a dawng hlawk lo hle dawn a, mipui mamawhna a phuhru zo dawn lo a ni,” a ti.
Ballygunj-a chhawng 3 baka sanga sak phal loh a nih lai hian Salt Lake lamah cheng vaibelchhe 18-20 vel pawhin House sak theihna khawpa zau ram a la lei theih a, chhawng sang taka sak theih a la nih bawk avangin, Salt Lake lamah sak a tum a. Ballygunge hi hmun laili a nih avangin to taka hralh theih a ni dawn tih MNF sawrkar khan hriain, dan ang thlapa open tender chhuahin a zuar a. A tira official-ten an chhut lawk aia toa hralh a ni nghe nghe tih a sawi bawk.
House hmun hralh chungchang hi ZPM sorkar chuan politics-a sawrkar liam ta beihna hmanruaah a hman avangin, ZPM worker-te chuan social media lamah thu diklo hmanga mipui bum tumna an aupui nasa a. A leitu hi chief minister hlui Pu Zoramthanga fapa a ni, ti tein dawt thu an vawrhdarh a. CM hlui fapa hian court-ah criminal complaint a thehluh phah a. Court thupek angin Cyber Crime Police-ten chhuizuiin, dawt ngialngan hmanga CM hlui fapa puhna thu tidarh hmasa bertu, ZPM worker chu an hre chhuak tawh a, dan rorelna a hmachhawn mek tih MNF vice president hian a sawi a ni.