Himachal Pradesh-ah nunna chan 72 tling tawh

Shimla-a Summer Hill area a Shiv temple chim atanga ruang pakhat lakchhuah leh hnuah Himachal Pradesh-a ruahsur nasa kaihhnawih avanga nunna chan 72 an tling ta.
Nunna chan lakchhuah hnuhnun ber hi Pro P.L. Sharma, Chairman, Department of Mathematics, Himachal Pradesh University a ni.
Tmeple hi August 14 khan mipui tam lai takin leiminin a chhilh a, tun thlengin mi pariat lai chu a la chhilh hnan nia ngaih a ni.
Pathianni kalta atang khan ruahsur nasain State a tuam a, hei vang hian hmun hrang hrangah leimin nasa tak tak a thleng a ni.
Ruahsur kaihhnawih avanga chhiatna hrang hrang thlen avanga nunna chan chu 72 tling tain Shimla bikah nunna chan 21 an awm tawh bawk.
Leimin liantham pathum Summer Hill, Fagli leh Krishna Nagar ah te a awm a. Summer Hill leh Krishna Nagar area ah hian chhanchhuah hna kalpui zui mek zel a ni a.
Principal Secretary (Revenue) Onkar Chand Sharma chuan furpui avanga an state-in an hloh tawh hlut lam chu 7,500 crore vel a ni tawh tiin a sawi.
SDM, Shimla (Urban), Bhanu Gupta chuan Shimla Urban segment ah education institution tin te khar turin thupek a chhuah a. Ruahsur nasa avanga leimin thleng nasa avangin kawngpui tam tak chu a ping bawk a. State pumah kawngpui 650 chuang a ping a, transformer 1,135 leh water supply scheme 285 a khawih buai tia sawi a ni bawk.
Chief Minister chuan kawngpui leh water project te siam tha tur chuan hun a duh dawn a ti a, mahse, a sorkar chuan a chak thei ang berin a kalpui dawn a ti bawk a. “Kum khat chhungin infrastructure te din that leh vek kan tum a. Chona nasa tak a ni ang,” tiin a sawi bawk.