Hindenburg report a hmahruai chauh ti
Adani issue chungchang Joint Parliamentary Committee (JPC) chhuichian rawtna chu Hindenburg Research te laihlan piah lam daih a ni tia sawiin Congress te chuan Adani group tena dan kalh leh thil dik lo an tih chuan political economy tin a fan vek a ni, an ti.
Congress general secretary in-charge communications Jairam Ramesh chuan “Hindenburg hi a ve lek chauh a ni,” tia sawiin anni chuan capital market chungchang chauh an tarlang, a ti.
“Adani ‘Mega Scam’ chhui tura Joint Parliamentary Committee (JPC) investigation ngiatna hian Hindenburg Research report pholan piah lam thil daih a ni,” tiin Ramesh chuan a sawi a.
Heng ‘scam’ hrang hrangah te hian Ramesh chuan Adani tena ports, airports, cement leh critical sector a monopoly an neih theih nan India investigative agencies te chu an hmangsual a ni, a ti bawk a.
Sorkar bank-te a bik takin SBI te chuan Adani group te chu duhsuakna uchuak a pe tia sawi bawkin chung hmang chuan project pawimawh Adani copper plant, Mundra te, Navi Mumbai-a airport te, UP-a Exressway Project te pawh a tel a ti bawk a.
Senior Congress leader chuan Adani Enterprise te hlawk nan India foreign policy te chu dah hniamin a awm hial a ni, a ti bawk a.
India-in Israel nena strategic relationship a neih chu company pakhat Adani kutah dah a ni a ti bawk a. Ramesh chuan coal leh power equipment tihsan uchuak chuan money-laundering a tihpun mai bakah Adani ten hlawkna uchuak telin khua leh tuite electricity bill a pun thur thur phah thung, a ti bawk.
Chu mai bakah Adani group te hnenah chuan vantlang ram pawimawh leh rohlu te chu man tlawm uchuakin hawh tir leh hawh theih hun chhung pawhsei sak zel an ni, a ti bawk a.
“Hindenburg te puhna khan a chunga kan sawi te khi a sawi lang miah lo. Anni chuan capital market te chauh – stock manipulation, accounting fraud leh regulatory agencies a conflict of interest te chauh an thlurbing a. Hindenburg te report kha sawi hmuhna lek chauh a ni,” tiin Ramesh chuan a sawi bawk a. “Heng thil zawng zawng hi Modani mega-scam hi JPC chauhin a nihna dik tak a lailang thei,” tiin a sawi bawk.