Hindi zirlaite zaa 95.65 pass
Hindi zirlaite zaa 95.65 pass
Mizoram Hindi Prachar Sabha (MHPS) hnuaia Board of Examination chuan Nilaini khan Hindi Exam 2025 First Examination result a tichhuak a, zirna hrang hrang lakkhawmin zirlai pass hi zaa 95.65 an ni.
MHPS hi Zofaten Hindi tawng kan thiam ve theihna atan kum 1954 khan mi thahnemngaiten an din a ni a. Assam Rashtra Bhasha Prachar Samiti hnuaiah awm thinin, state puitling kan nih hnuah central leh state recognised leh enkawl niin, Hindi Prathama (Class IV) atanga Hindi Praveen (BA) thleng Hindi zirna kalpuiin exam a buatsaih thin.
Tun tumah hian Hindi Prathama – Madhyam ah mi 6 exam awmin 5 an pass. Hindi Praveshika ah 8 exam an pass vek a; Hindi Prabodh ah 18 exam zinga pakhat tih loh an pass vek. Hindi Visharad ah mi 14 exam-te an pass vek a; Hindi Praveen (1st Sem) ah 33 exam atangin 31 an pass a, Hindi Praveen (2nd Sem) ah mi 13 exam-te an pass vek a ni.
A vaia lakkhawmin, exam hmachhawn zirlai 92 zinga 88 (95.65%) an pass a ni.
MHPS chairman RB Lalmalsawma chuan, Hindi zirtirtu tam tak ban an nih thin avang leh post ruak (regular) tam tak hnawh khah a nih loh avangte, Covid len vangin Hindi zirlai an tlahniam hret hret tih a sawi a. Central service-ah leh eizawnna hrang hrang atan Hindi tawng thiam a pawimawh zia hria in, Zofaten Hindi tawng zir kan uar sauh sauh an duh tih sawiin, MBSE hnuaiah compulsory subject-ah Hindi tawng hi tel rih lo mah se, major lndian language (MIL) ah zirlaiten lak telh nachang hre turin an ngen tih a sawi.