History-a tennis player tha ber Djokovic

Rafael Nadal chuan tennis chanchina player tha berah mipate zinga grand slam title 24 la tling thei awmchhun Novak Djokovic a puang.
Kum 2022 French Open hnu lama Grand Slam title hlawh-chhuak leh ta rih lo Spaniard hi kephah hliam damchiang thei lo leh hliam dang neuh neuhin a tlakbuak chho ta reng a, Grand Slam lak tama a nihrualpui thin Serbian chu pahnihin a pha lo duai tawh a; tunhnai US Open-a a cham-pion lehna kha kum kal laia major title pathum a lakna niin, Nadal chuan tennis history-a thiamberah Djokovic a puang ta a ni.
Tunhnaia AS chanchinbuin an kawmna an tarchhuahah Nadal chuan, “Number chu number, statistics chu statistics a nih avanga ring mi ka ni a, he tehna atang hian ani (Djokovic) hi kei aiin tam zawngah a chungnung a, chu chu hnial ngaihna awm lo a ni.
“Thudik chu thudik ni mai se. A dang zawng chu duhna te, midangte tihphurna han tih angte’n a kal thei a, title chu zah tur a ni a, Djokovic hi history-a tha ber chu a ni a, chumi chungchangah chuan sawi belh tur a awm lo e,” a ti.
Hliam avangin Nadal hi tunhnai kum chhoah a chechhuak thei lo a, 2021 US Open pawh kha kephah hliam avangin a khel thei lo a, khami kum tluan khan a talbuai.
Grand Slam lak tam kawnga Serbian a tluk tak loh chung-changah Mallorcan hian a hliam neih a kawk duh lo a, chhuanlam siam tumna a nei lo a, number leh statistics-a chungnung zawk chu a fak mai a ni.
Kum 37 mi hian tunhnaia rawn langsar chho ta a chipui Carlos Alcaraz chungchang pawh tarlang telin, kumin Wimbledon champion chu tunhnaia world number one luah thei a nih thu leh la naupang teh mah se Alcaraz tana elpui tak tak tling awmchhun chu tun din-hmunah Djokovic chauh a nih thu a sawi a, chu chuan Alcaraz a dah-sanzia a pholang chiang awm e.