History thar ziak chunga champion Bayer Leverkusen

Pathianni zanah Bundesliga title la fel tawh Bayer Leverkusen chuan an league match hnuhnungber khelin Augsburg lakah 2-1 hnehna an sualchhuak leh a, German top flight-a tlawm nei loa season hmang zo thei team hmasaber nihna nen champion an lawm.
Xabi Alonso hoa treble champion nih la tum kal mek Leverkusen hian European record pawh la vawngnung chhunzawm pah zelin, season kal lai competition hrang hrangah tlawm la nei eih loin match 51 an chuangkai tling ta chiah a, kartawp Europa League final-a Atalanta an sut leh tur bakah May ni 25 German Cup final-a an hmachhawn tur Kaiserslautern hi an hneh ve ve chuan trebel champion ni chungin German football leh Europe thlengin record ropui an hnutchhiah dawn a ni.
Bundesliga season an hman zawh takah khan vawi 28 chaka draw vawiruk neiin point 90 nen a sangber ni chungin season an khar a; Inrinni inkhel danga sili faia Borussia Moenchengladbach hnehtu VfB Stuttgart chu pahnihna niin, Alonso team lakah point 17 zetin an hniam zawk.
Table tawp lamah Heidenheim muala 4-1-1 tlawm Cologne chu Darmstadt 98 zuiin an ‘relegate’ a; VfL Bochum chuan relegation playoff an khel thung ang.