HIV donaa ‘hma sawn hret’ hi…

National AIDS Control Organisation (NACO)-in kum 2025-26 chhunga India ram state leh UT hrang hranga State AIDS Control Society-te hnathawh that dan tehna September 2025-a a tihchhuahah, Mizoram State AIDS Control Society chu pathumna dinhmunah kan awm niin nimin khan health minister chuan a sawi a. Mizoram chhunga HIV dona kawngah hma kan sawn ve hret hret zelin kan inhria, a ti bawk.
Hmasawn tih tawngkam hi chu a lawmawm lam a ni deuh zel a, India rama HIV hluarna ber kan nih mek avangin, HIV/AIDS dona kawnga Mizoramin hma a sawn hret hret a nih chuan, a prevalence rate pawh a kiam thla ve hret hret zel tura ngaih a ni a. Chutih laiin, tuna kan stand ni mek, 2.73% hi, hmasawn hret hret kan intihna hian engtiang chiahin nge a hnuh hniam tih erawh chiang taka hriatna a la awm rih lo niin a lang. HIV/AIDS dona kawnga hma kan sawn hret hret a nih chuan, prevalence rate pawh a hniam ve zel tur niawm tak a ni a, chutiang tur chuan beisei phawt mai ila, a tha awm e.
A thawk pawl hi chuan an thawk nasa a, an hahpui hle tih pawh a hriat a. Chutih rualin, he thil hi mimal nun, mimal duhthlanna thil a nih deuh roh avang hian, drugs ngawlveite han khawm rup rup a, rehabilitation camp etc.-a han khalh luh ngawt ang a nih lohna lai a awm a, hma lak thiam pawh a awlai lo viau awm e.
Tuna record tharlam ber kan neih ang chuan, Mizoramin HIV/AIDS a hmelhriat tan kum 1990 atanga Nov 2025 thlenga HIV+ve hmuhchhuah tawh zat chu 33,781 a ni a, kum 35 chhung hian chawhrualin kum tin HIV 965 an awm a, thla tin 80, ni tin 2.6 an awm ziah ang a ni.
Nikuma health minister-in chanchinbumite a hrilh danin, kum 2020 leh July 2025 inkar (kum 6 chhung)-a HIV/AIDS vanga thi chu mi 2,996 an tling a. Chumi awmzia chu, chawhrualin kum tin HIV/AIDS vangin mi 499 an thi a, thla tin mi 41, ni tin mi 1 (1.3) thi zel ang an ni.
Kum 35 kaltaah khan HIV/AIDS vei pakhat hmuhchhuah a ni a, kum 35 a han vei leh meuh chuan HIV/AIDS vangin ni tin pakhat kan thi ta zel mai tihna a ni.
Tuna naupang, thalai, thang chho mekte hian he hri tha lo tak an kai lohna tura nasa taka tan lak hi HIV dona hmanrua tha leh sawt ber tur a nih a rinawm a. HIV/AIDS do dana ‘hma sawn hret hret’ tih hian HIV a tlakhniamtir ngei theihna tur leh, thalai la thianghlim mekten an kai ve lohna tur hian nasa takin tan la ila, chu chu HIV do dan sawt tak a nih a rinawm.