HIV kai thar tlem tial tial

HIV kai thar tlem tial tial
Mizoram State Aids Control Society record neih atanga a lan danin, kum 5 kalta vel atang khan Mizoramah HIV kai thar an tlem tial tial tih sawi a ni.
MSACS Governing Body chu an chairman, Health minister Lalrinpuii hoin Nilaini khan an thukhawm a. MSACS project director Dr Jane Rinzuali Ralte sawi danin, 2024 April – 2025 March chhung khan Mizorama ART Centre 14-ah HIV kai 2069 inziaklut thar an awm a, ART (antiretroviral therapy) dawng zingah midang hnena kai chhawng thei lo tur (viral suppression) zaa 97.7 an awm. Kum 5 kalta vel atang khan Mizoramah HIV kai thar an tlem tial tial a ni.
HIV do kawnga hmalaknaah, nikum khan Tawngtai Bethel Camping Centre-ah HIV kai awm leh awm loh endik a ni a, HIV kaite damdawia enkawl kawnga hriat tur tul inhrilh, district tinah Intensive IEC Campaign leh HIV/AIDS avanga nunna chante hriatrengna ‘Candle Light Vigil’ neih te chu a langsar zual a ni.
Mizoram State Blood Transfusion Council chu ‘Excellence in Blood Donation 2023- 2024’ lawmman dawngin hmarchhak state ho zinga titha ber a ni tih a sawi bawk.
Health minister chuan Mizorama mihring awm zat atanga chhutin (prevelance) HIV kai zaa 2.73 kan awm mek a, India rama a sang ber kan ni chu veiawm a tih thu sawiin, HIV do zel turin chak zawka hma lak tul a tih a sawi.
Health secretary H Lalengmawia pawhin HIV kaite chu ‘The HIV and AIDS (Prevention and Control) Act 2017’ chuan hna laknaa duhsak loh (discrimination) lakah a veng tih a sawi a, inthlahrung loa hna dil tur an ni tih a sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More