HIV kaite intelkhawmna pawl tlangzarh

HIV kaite intelkhawmna pawl tlangzarh
Sawrkar hriatpui leh sawrkara inziaklut thar Mizoram State Positive Network (MSPN) chu Inrinni khan Health & Family Welfare minister Lalrinpuii’n a tlangzarh.
Health minister chuan Mizorama HIV kaite inzawmkhawmna leh intihchaktawnna tur pawl din a ni chu lawmawm a tih thu sawi a. HIV kaiten mahni dinhmun inpawm leh nunpui thiam a, hmalam hun thlir thiam tura fuihtu an mamawh, tiin, hemi atan hian anmahni dinhmuna ding ve leh an tawn ang lo paltlang ve tawhte chu an tangkai hle tih a sawi a ni.
HIV hrik kaiten ART ((Antiretroviral Therapy) tha taka an lak chu sawrkarin a ngaihpawimawh a, a thlawna ART lak theihna Centre 14 chu ZMC&H, Kulikawn Hospital, Synod Hospital leh District Hospital tinah buatsaih a ni tih a sawi a. HIV kaihhnawih natna dang laka an him theihnan leh midang an kaichhawn lohnan ART tha taka lak a pawimawh tih a sawi.
Ruihhlo hluar chuan thil tha lo tam tak a kentel zingah HIV pawh a tih darh nasat phah tih Lalrinpuii hian sawiin, ruihhlo rawn lut tur dan a pawimawh rualin ruihhlo ti lo tura inhrilh tam a ngai tih a sawi a. Sawrkar chuan HIV darh zel tur ven leh inzirtir lamah nasa takin hma a la tih a sawi bawk.
Mizoram State AIDS Control Society project director Dr Jane Ralte chuan Mizorama mihring awm zat atanga chhutin HIV kai mi 2.73% an awm mek tih sawiin, “India ram pumah a sang ber kan ni a, HIV kai thar erawh kum 2018 atangin an tlem tual tual thung. HIV hrik kaia inrinhlehna nei an awm chuan inendik thuai a pawimawh a, kan positive chuan ART tha taka lak a pawimawh,” a ti.