Hliam vanga ATP Finals khel lo tur Djokovic

Hliam vanga ATP Finals khel lo tur Djokovic
Kumina Olympic gold medal bak title lak la nei lo Novak Djokovic chu senior lamah hliamin a tlakbuak ve ta fo a, Turin khawpuia mipa tennis season kharna tournament khelh tur ATP Finals-ah pawh hian hliam avangin a inhnukdawk a, a title kawl lai chu a tel loin midangin an inchuh a ngai dawn a, ranking lamah pawh parukna ni duai chunga kum a khar a ngai dawn ta a ni!
Kum 37-a upa ni ve tawh Serb hi ATP Finals-a champion ngun ber niin, kumin hian Paris-ah bak title lak nei lo mah se a lo berah pawh ATP Tour-a player chetha parukna a nih phak dawn avangin Turin tournament lian khel turin a tling a, mahse, hliam a neih mek avangin a tel thei dawn lo tih social media kaltlangin a puang.
Djokovic chuan, “Inlan leh ngei tumin ka inbuatsaih a, mahse, ka hliam neih mek avang hian karlehah ka la chechhuak hman dawn lo a, hmuh ngei min beiseitute lakah thupha ka chawi a; he tournament ropuia inlan tur zawng zawngte duhsakna ka hlan nghal a; kan inhmu leh thuai dawn nia,” tiin a ziak.
Record siama Grand Slam men’s singles title 24 la tling awmchhun Djokovic hian eng hliam chiah nge a tawrh tih atarlang tel lo.
Kumin bikah match 46 khelin vawi 37 a chak a; tarlan tak angin, Paris Olympic Games-a a title lak bak tun season-ah title kawh tur dang a nei dawn ta lo a ni!
Tun hi kum 2005 hnu lama ATP tour title a lak zawh loh vawikhatna a nih rualin kum 2008 hnu lama Grand Slam title pakhat tal hawn loa kum a khar vawilina chiah a ni nghal.
Kum 2001 hnu lamah kumin hi tennis big three an tih – Roger Federer, Rafael Nadal leh Djokovic-te zinga a tu emaw tal tel loa mipa tennis season kharna tournament an khelh vawikhatna tur a ni bawk.
Thla hmasa khan tun dinhmuna world number five ni mek Djokovic hian kumin tour kharna tournament khelh chu a ngaihpawimawh zingah a tel lo tih sawiin, ranking lam pawh a um lo tih a lo sawichhuak tawh a, kumin hi a zawi ta tlat a, tennis big three dang Roger Federer leh Rafael Nadal-te hnung zuiin a chuai chho ve tan ta tih loh theih a ni lo!
Nikum ATP Finals title a lakna kawnga a hneh Jannik Sinner khan world number one nihna a khum mek a; No. 1 nihkirleh chungchang ai chuan a career tawp lama Grand Slam title dang sualchhuah leh chu a tum ber a ni a, a record kawl mek khum harsa zual tura major title dang han lak leh bak ngaihtuah dang a nei tam ta lo niin a lang!
Kumthar January ni 12 atanga khelh tan tur Australian Open hi a tournament khelh leh hmasakber tur niin an ngai a, Melbourne-ah hian a champion leh a nih chuan Margaret Court-i nena an record intawm kalsanin major singles title 25 la tling awmchhun a ni dawn a, a trophy khawlbawmah tour-level trophy 100 a khung tling chiah bawk ang a, chu mi hnu lamah chuan hnah thar lo chhuak mek karah hahdam taka tennis chawlhsan lam a hawi zui hnai chho ve tawh tura ngaih a ni.
ATP Finals atanga Serb a inhnuhdawk takah hian Turin tournament khel tura tling nghal Italy player Jannik Sinner, Spain star thar Carlos Alcaraz, Germany chhuanvawr Alexander Zverev, Russia innghahna lian Daniil Medvedev leh Taylor Fritz of the United States-te bakah Norway mi Casper Ruud, Australian Alex de Minaur leh Russian Andrey Rublev-te’n champion nih an inchuh ang.
Karliamta Paris Masters quarter-final match pakhata Holger Rune laka tlawm De Minaur tan tun hi ATP Finals a khelh vawikhatna tur niin, a elpui turte hi world number one leh tualchhung player ni bawk Sinner, kum kharnaa vawihnih champion tawh Zverev, kum naupang te ni chunga Grand Slam title pali tehreng la tling tawh Alcaraz, leh U.S. Open champion hlui Medvedev tihte an nih nawk avangin champion tura beisei chi a ni rih lo ang!
He tournament hi November ni 10-17 chhungin Italy ram khawpui ngainat hlawhah hian an khel dawn a ni.
Inalpi Arena-a khelh tur ATP Finals-ah hian singles leh doubles-a chhuak pha chinin US dollar maktaduai 15.25 an insem dawn a, tlawm nei miah loa singles champion ni thei phei chuan US dollar maktaduai 4.88 zet a thei dawn!