Hlimena transport hmunhma bun enpui

Transport department-in Hlimena lirthei endikna leh certificate pek chhuahna tura an ruahman, Inspection & Certification Centre (I&C Centre) sak mek chu Transport minister Vanlalhlana chuan Zirtawpni khan tlawhin hmalakna a enfiah.
Minister ho hian I&C Centre kentel dang – Inspection Shed leh Administrative building sak mek bakah project kentel dang pawh an enfiah a. Tunhnai ruahsur nasa avanga I&C Centre sakna hmunhma leh a chhehvela harsatna thleng chu enin, PWD nen inrawntlanga tui luankawr mumal leh tha zawk siam dan tur bakah inkalpawhna mumal tak siam dan tur enho a ni.
Inspection & Certification Centre Hlimen hi sawrkar laipui Ministry of Road Transport & Highways (MoRTH), Mizoram Transport department leh Central Institute of Road Transport (CIRT) Pune Maharashtra ten thawhhona thuthlung – tripartite MoU an ziah anga kalpui a ni. Cheng vaibelchhe 15.50 senna tur niin, senso zaa 90 hi sawrkar laipui tum tur a ni a, a bak zaa 10 chu state sawrkarin a tum ang. Tunah hian sawrkar laipui atangin cheng vbch. 5.34 hmuh tawh niin, heng zinga nuai 34 hi direct-in CIRT Pune-ah MoRTH kaltlanga pek a ni. State sawrkar atangin nuai 54.40 hmuh a ni tawh bawk.
Administrative building leh Inspection Shed sak hna hi e-tender kaltlangin M/s Vinco Construction Edenthar kuta pek a ni a, civil works hi tun financial year chhunga zawh hman tum a ni. Sak zawh hunah MoRTH duhdanin Automated Testing Station-a puan tur a ni a. Lirthei fitness chu he hmunah hian khawl hmanga en tawh tur a ni ang. MoU ziah ang chuan, peihfel a nih hnu kum hnih chhung chu CIRT Pune-in a enkawl phawt dawn a, Transport department staff-te training an pe anga, kum hnih hnuah department kutah an hlan ang.